«Մարդը գործը տվել է դատախազություն, քննություն է ընթանում եւ յուրաքանչյուր բանական մարդ, կարծում եմ, պետք է սպասի` քննությունն ընթանա ու իրավական գնահատականներից հետո նոր քաղաքական քննարկումների եւ գնահատականների անհրաժեշտություն կառաջանա»,- Aravot.am-ի հետ զրույցում ասաց ՀՀԿ խմբակցության պատգամավոր Մկրտիչ Մինասյանը:
Պարոն Մինասյանից հետաքրքրվեցինք` չի՞ պատրաստվում իշխող ՀՀԿ-ն ականջալուր լինել մեր երկրում գերիշխող այն տեսակետին, որ օֆշորային սկանդալից հետո ՀՀԿ-ն պետք է վերանայի վարչապետ Տիգրան Սարգսյանի պաշտոնավարման հետագա նպատակահարմարությունը: Այդ մասին Aravot.am-ի հետ զրույցում վերջերս ասել էր նաեւ նախկին բարձրաստիճան պաշտոնյա Դավիթ Շահնազարյանը. «Իշխող ՀՀԿ-ն պետք է քննարկի գործող կառավարության մնալ-չմնալու հարցը: Սա վերջապես քաղաքական պատասխանատվության հարց է, որից անհնար է խուսափել»։
ՀՀԿ-ական պատգամավորից հետաքրքրվեցինք` ինքն անվերապահորեն վստահո՞ւմ է ՀՀ իրավապահ համակարգին: «Բա ո՞ւմ պիտի վստահեմ»,-հարցից փոքր-ինչ նեղսրտեց պարոն Մինասյանը: Նկատեցինք, որ Հայաստանում շատերը չեն վստահում մեր իրավապահ համակարգին: Պարոն Մինասյանն ասաց. «Դա այնպիսի գործ է, բնականաբար նաեւ հասարակական հսկողության տակ է: Հետեւաբար, այն մտորումները եւ մտավախությունները, որ որոշ մարդիկ ունեն, այս դեպքում, կարծում եմ, անտեղի է: Հասարակական հնչեղությունը, հասարակական հետաքրքրությունը պահանջ են ներկայացնում, որ մեր քննչական մարմիններն ամեն ինչ պետք է անեն օրենքի տառին համապատասխան»:
Հետաքրքրվեցինք` ճիշտ չէ՞ր լինի, որ մինչեւ վերջնական իրավական գնահատականը վարչապետը գոնե ժամանակավորապես թողներ պաշտոնը: ՀՀԿ-ական պատգամավորն ասաց, որ ինքը հարգում է անմեղության կանխավարկածը:
Կարդացեք նաև
Նելլի ԳՐԻԳՈՐՅԱՆ
Հետաքրքիր է´ շարքային քաղաքացուն, մի շատ ավելի մեղմ հանցագործության մեջ կասկածելով, կարելի է նրան կալանքի տակ վերցնել կամ որևե այլ խափանման միջոց ընտրել: Իսկ եթե անհերքելի ապացույցներ կան, որ երկրի վարչապետը օֆշորայն հաշիվ ունի բացված, էլ չեմ ասում թույլ է տվալ բյուջեից հարյուր միլիարդների թալան (լինելով ամենամեծ թալանչիներից մեկը), ուղղակի դիմում է դատախազությանը, և մնալով իր պաշտոնում շարունակում է իր թալանը: Ինչու այն նույն շարքային քաղաքացին չի կարող նույնպես դիմել դատախազություն և շարունակել ապրել իր նորմալ կյանքով: Սա ինչ է ասում գլխավոր թալանչու´ՍՍ-ի մասին?