«Խ. Աբովյանի անվան հայկական պետական մանկավարժական համալսարանի ուսանողական խորհուրդը հուլիսի 1-3-ն իրականացրել է «Այցելություն Արցախ» խորագրով ճանաչողական ուխտագնացությունը:
Այսօր` հուլիսի 5-ին, «Նոյյան Տապան» լրատվական կենտրոնի հյուրերն էին Խ. Աբովյանի անվան հայկական պետական մանկավարժական համալսարանի ուսանողական խորհրդի նախագահ Ներսիկ Մարգարյանը, ու մի քանի ֆակուլտետների ուսանողական խորհուրդների նախագահները: Հանդիպման ժամանակ խոսեցին իրենց տպավորությունների մասին:
Ներսիկ Մարգարյանն ասում է, որ ՀՊՀՄ և Երիտասարդական հիմնադրամի հետ համատեղ կատարեցին ուխտագնացություն դեպի Արցախ. «Շեշտը դրել էինք այն ուսանողների վրա, ովքեր առաջին անգամ էին լինում Արցախում: Չափանիշներից մեկը ցանկությունն էր, ընտրվել են այն ուսանողները, որոնք ակտիվ գործունեություն են ծավալել»:
«Մենք ունենք սկզբունք. եթե անձը չճանաչի իր երկիրը, չի կարող համարվել այդ երկրի քաղաքացին»,-այս համոզմանն է կուլտուրայի ֆակուլտետի ուսանողական խորհրդի նախագահ Վարազդատ Եղիազարյանը:
Կորկոտյան Գրիգորը, որը մանկավարժական համալսարանի ուսանող է, կարծում է,որ Ղարաբաղ այցելելը հայրենասիրական ոգու դաստիարակման բնույթ ունի. «Երբ տեսա Ղարաբաղը՝ սկսեցի մտածել` ահա թե ինչի համարի արժե ապրել, և ինչի համար մեռնել»:
Կարդացեք նաև
Արյուսակ Գևորգյանը տպավորված է Ղարաբաղով, այնտեղի ամեն մի մասնիկը ոգեշնչող էր, տպավորված է Գանձասարով:
Ներսիկ Մարգարյանը իր խոսքը ավարտեց Վազգեն Սարգսյանի խոսքերով. «Մի քիչ հույս և հավատ, և 21-րդ դարը մերն է լինելու»:
Մելանյա ՀԱՐՈՒԹՅՈՒՆՅԱՆ
