Արդեն երկու օր է ակտիվորեն քննարկվում է երեկ ՀՀ ԱԺ-ում տեղի ունեցած սկանդալը, երբ Մոլդովայի խորհրդարանական փաստաբան Աուրելիա Գրիգորիուն մեր խորհրդարանի ամբիոնից հայտարարեց, թե Խոջալուի ցեղասպանությունն իրականացրել են հայերը և այլն:
Փաստաբանի, որը նաև Մոլդովայի օմբուդսմենն է, ելույթը որակվեց որպես «պատվեր», որպես «Ադրբեջանի լոբբիզմի բացահայտ իրականացում» և այլն:
Մեդիա փորձագետ Սամվել Մարտիրոսյանն իր բլոգում հրապարակել է տիկին Գրիգորիուի ֆեյսբուքյան բազմաթիվ գրառումներ, որոնք վերաբերում են նրա՝ Ադրբեջանի նկատմամբ տածած սիրուն: Օրինակ՝ նա Բաքուն կոչում է սիրելի քաղաք և այլն:
Կարդացեք նաև
Aravot.am-ը Ս. Մարտիրոսյանից հետաքրքրվեց՝ սրանք բավարա՞ր փաստեր են մոլդովացի փաստաբանի՝ Ադրբեջանին «ծախված լինելու» մասին խոսելու համար: Նա պատասխանեց. «Չենք կարող անմիջականորեն մարդուն մեղադրել, որ ինքը ծախսված է, քանի որ չունենք փաստեր: Բայց կա երեք փաստերի համադրություն: Այն, որ ինքն իր ֆեյսբուքյան էջում վերջին մեկուկես ամսվա մեջ ավելի շատ Ադրբեջանի մասին է գրել, քան Մոլդովայի, չնայած ինքը Մոլդովայի մարդու իրավունքների պաշտպանն է:
Երկրորդը այն է, որ ինքն իր ելույթը փաստացի կապել է մի հակամարտության հետ, որի հետ Մոլդովան բացարձակ կապ չունի:
Եվ վերջապես այն, որ ինքը բառացիորեն, անգիր արածի պես կրկնել է ադրբեջանական քարոզչական բոլոր թեզերը: Այս երեքն իրար համադրելով կարելի է ասել, որ նա առնվազն Բաքվի ազդեցության գործակալ է: Թե դա նա անում է փողով, թե նվեր է ստացել, թե պարզապես սարսափելի էնտուզիազմ ունի Ադրբեջանի հանդեպ, երկրորդական հարցեր են» :
Հետաքրքրվեցինք՝ այս փաստերն ինչպե՞ս ճիշտ օգտագործենք: Ս. Մարտիրոսյանը պատասխանեց. «Պետք է առաջինը հանրությունը հասկանա, որ գործ ունենք կողմնակալ անձի հետ: Հենց Մոլդովայի հասարակությունը պիտի հասկանա, որ իրենց օմբուդսմենը քիթը մտցնում է այնպիսի տեղեր, որտեղ պետք չէ մտցնել՝ հաշվի առնելով նաև այն հանգամանքը, որ Մոլդովան էլ է երկիր, որն ունի չլուծված հակամարտություն: Մենք ինչ էլ անեինք, ադրբեջանցիները այսպիսի մեկին կգտնեին»:
Տաթև ՀԱՐՈՒԹՅՈՒՆՅԱՆ
Կատարվածի մեղքը էդ մոլդովանկին հրավիրողնն է: