«Երիտասարդները պարտավորված չեն, սահմանափակումներ չունեն: Համաժողովի համար ունենք 2 հիմնական հարց, որը անհանգստացնում է մեր ակումբներին՝ առաջինը երիտասարդների գործազրկության մակարդակն է, երկրորդը երիտասարդների ներգրավվածությունը եւ մասնակցությունը հասարակական, քաղաքական կյանքին եւ որոշումների կայացման գործընթացին»,-այսօր Aravot.am-ի հետ զրույցում Հայաստանի Երիտասարդական Ակումբների 4-րդ համաժողովի ժամանակ նշեց Երիտասարդական ակումբների դաշնության նախագահ Ատոմ Մխիթարյանը (լուսանկարում):
Նրա խոսքով համաժողովին մասնակցում են 100-ից ավելի երիտասարդներ, ովքեր երիտասարդական ակումբների եւ կենտրոնների ղեկավարներ են: Համաժողովը կազմակերպվում է ամեն տարի, այն երիտասարդական ակումբներին փորձի փոխանակության հնարավորություն է ընձեռում: Երիտասարդներն այսօր ավելի շատ օգտագործվում են, նրանք սեփական որոշումներ կայացնելու հնարավորություն քիչ ունեն: Դաշնությունն իր 14-ամյա գործունեության ընթացքում կուտակել է հզոր փորձ, դարձել է Հայաստանի երիտասարդական ոլորտի հայտնի կազմակերպություններից մեկը՝ դավանելով «բաց երիտասարդական աշխատանքի» սկզբունքը:
«Երիտասարդության խաղաղության եւ բարեկամության կամուրջներ» հասարակական կազմակերպության փոխնախագահ Հերմինե Պողոսյանի պնդմամբ համաժողովը հետաքրքիր է.
«Ինձ հետաքրքրում է թիմային աշխատանքը եւ հետագայում համագործակցությունը: Երիտասարդների դերը հասարակության մեջ շատ կարեւոր է, վերջին մի քանի տարիների ընթացքում երիտասարդները ակտիվ կերպով ներգրավվում են հասարակական-քաղաքական կյանքին, տեղեկացված են իրենց իրավունքներին՝ փորձելով ակտիվ գործունեություն ծավալել, սակայն սոցիալական պայմաններն երբեմն խանգարում են»:
Հուլիսի 5-7-ը կայանալիք համաժողովի հիմնական նպատակն է՝ Հայաստանում զարգացնել երիտասարդական ակումբային շարժումը, նպաստել երիտասարդական ակումբների համախմբմանն ու տարածմանը: Երիտասարդական ակումբների 4-րդ համաժողովի քննարկման հիմնական թեմաներն են լինելու երիտասարդության ներգրավածությունը, մասնակցությունը եւ զբաղվածությունը:
Անժելա ՇԱՀՈՒՄՅԱՆ
