«Պատմությունը շատ դինամիկ եւ զարգացող գիտություն է, որից պետք է դասեր քաղել, իսկ քաղելու համար պետք է պատմությունը լավ իմանալ»,- այսօր այս մասին Պատմության ինստիտուտի երիտասարդ գիտաշխատողների 34-րդ գիտական նստաշրջանի ընթացքում ասաց ակադեմիկոս Յուրի Սողոյանը:
Վերջինս նշեց, որ ոչ ոք չի կարող ժխտել, որ հայ ժողովրդի պատմությունը շարադրվել է Պատմության ինստիտուտի կողմից, հավելելով, որ վաղվանից նիստերն անցկացվելու են Աղվերանում:
Գիտաժողովը նվիրված է Պատմության ինստիտուտի հիմնադրման 70-ամյակին, որին նվիրված միջոցառումների շարքը կիրականանա աշնանը եւ որի մեկնարկը տրվեց այսօր:
Նստաշրջանի ընթացքում հնչեցին զեկույցներ` առօրեականության պատմության վերաբերյալ, որը պատմական գիտության համեմատաբար նոր ուղղություններից է:
Կարդացեք նաև
ԳԱԱ պատմության ինստիտուտի գիտաշխատող Համո Սուքիասյանն ամփոփ կերպով ներկայացրեց ՀՀ ԳԱԱ պատմության ինստիտուտի կարկառուն ներկայացուցիչներին, հորդորելով, որ երիտասարդ գիտաշխատողների պարտքն է՝ շարունակել նախորդ տասնամյակների կատարած աշխատանքը: Դոցենտ Կլիմենտ Հարությունյանն էլ նշեց, որ այն գիտաշխատողը, որն անում է ինքնուրույն աշխատանք, նա կարող է հաջողության հասնել:
ՀՀ ԳԱԱ պատմության ինստիտուտի փոխտնօրեն, պատմական գիտությունների թեկնածու, դոցենտ Կարեն Խաչատրյանն ասաց, որ չկա այնպիսի մի գիտաշխատող, ով ելույթ չունենա երիտասարդական գիտաժողովին, քանի որ սա եւս մի հնարավորություն է: «Տարեց տարի գիտական որակը բարձրանում է: Երիտասարդ գիտաշխատողների լավագույն աշխատանքներից կպատրաստվի ժողովածու, ինչպես եղավ նախորդ անգամ: Ես պետք է նշեմ, որ բավականին խիստ ընտրություն է կատարվում, լինում են աշխատանքներ, որոնք հետ են ուղարկվում, որին ես դրական եմ նայում»,-ասաց Խաչատրյանը, հավելելով, որ գիտաժողովի փակումը տեղի կունենա հուլիսի յոթին, իսկ վեցին կամփոփվեն արդյունքները:
Հիշեցնենք, որ Պատմության ինստիտուտը հիմնադրվել է 1943թ. նոյեմբերի 29-ին` Գիտությունների ակադեմիայի հետ միաժամանակ, իսկ ինչ վերաբերում է երիտասարդական գիտական նստաշրջաններին, ապա այն կազմակերպվել է 1962թվականից, այդ ընթացքում իրականացնելով 34 նստաշրջան:
Քրիստինա ՄԻՐԶՈՅԱՆ
