Հուլիսի 6-ին՝ ժամը 18:00-20:00, Սիրահարների այգում կկազմակերպվի էքսպերիմենտալ երաժշտության փառատոոն, որին մասնակցում են հինգ երկրներ` Հայաստան, Լեհաստան, Վրաստան, Թուրքիա, Միացյալ Նահանգներ: Փառատոնի նպատակն է երաժշտության միջոցով տարածել խաղաղության մշակույթը Եվրոպայում և նպաստել հակամարտությունների կարգավորմանը: Փառատոնի խորագիրը` «Խաղաղության ձայներ»:
«Քաղաքական ֆորում» հասարակական կազմակերպության նախագահ Նարինե Մանուչարյանն ասում է, որ փառատոնի գաղափարը առաջացավ անցյալ տարի: Հիմնական նպատակը այն էր, որ Հայաստանում լինի երաժշտական մի փառատոն, որը նվիրված է խաղաղությանը և խաղաղության մշակույթին, քանի որ Հայաստանը կոնֆլիկտային երկիր է. «Մտածեցինք, որ հետաքրքիր կլինի բերել երաժշտական խմբեր այն երկրներից, որոնք նախկինում ունեցել են կոնֆլիկտներ Հայաստանի հետ»: Կազմակերպության հիմնական նպատակն է Երևանում ունենալ այդ նպատակին ծառայող երաժշտական, երիտասարդական փառատոն, քանի որ երիտասարդությունն է, որ այսօր շարժիչ ուժ է հանդիսանում: Թուրքիայի ներկայացուցիչ Mehmed Kanplata-ն ինքն է ցանկացել մասնակցել փառատոնին, ու շատ երջանիկ է, որ Հայաստանում է. «Ինձ համար անակնկալ էր, որ հայերը շատ բարյացակամ են»:
Մեծ Բրիտանիայի մասնակից` Saorla Boyle կլառնետ է նվագում, ու ասում է, որ սա իր համար հիանալի փորձառություն է հանդես գալ Հայաստանում. «Ինչքան էլ մեր հայացքներն ու աշխարհայացքները տարբեր են, այս փառատոնը մեզ միավորում է: Բազմազանությունից կարող ենք նոր բան վերցրել»: Daul Connolly-ին, որը նույնպես ներկայացնում է Մեծ Բրիտանիան, Հայաստանին ու իր երկրին հարևան չի համարում, ու նշում է, որ մենք նույն շենքի մեջ ենք ապրում, այդ կարծիքին է հանգել`շփվելով հայ երիտասարդների հետ:
Կարևորելով երիտասարդության դերն ու գնահատելով նրա մեծ ներդրումը ` փառատոնը նպատակ ունի համախմբելու համամարդկային արժեքները կրող երիտասարդներին խաղաղության գաղափարի շուրջ: Փառատոնի մասնակիցները կմասնակցեն նաև «Վարդավառ» տոնին ու նոր կմեկնեն:
Փառատոնը կազմակերպում է «Քաղաքացիական ֆորում» հասարակական կազմակերպությունը: Ծրագրին աջակցում է նաև «Պողոսյան պարտեզներ» բարեգործական հիմնադրամը:
Մելանյա ՀԱՐՈՒԹՅՈՒՆՅԱՆ
