Հուլիսի 7-14-ը Երեւանում կայանալիք «Ոսկե ծիրան» 10-րդ միջազգային փառատոնի արտամրցութային «Ռուսական կինո» ծրագրի շրջանակներում կցուցադրվի ռուս ռեժիսոր Պավել Ռումինովի 2012-ին մեծ էկրան բարձրացած, «Кинотавр» կինոփառատոնի գլխավոր մրցանակ ստացած «Կողքիդ կլինեմ» ֆիլմը:
Այն պատմում է Իննայի (Մարիա Շալաեւա) ու իր 6-ամյա որդու՝ Միտյայի մասին:
Իննան միայնակ ու հաջողակ կին է, ռեստորանում մենեջեր է աշխատում ու դաստիարակում որդուն՝ Միտյային: Միտյան տաղանդավոր, բարի երեխա է, ու մոր եւ որդու միջեւ ջերմ, հոգատար փոխհարաբերություններ են ձեւավորվել:
Ամեն ինչ փոխվում է, երբ ֆիլմի գլխավոր հերոսուհին՝ Իննան, իմանում է, որ գլխուղեղի քաղցկեղ ունի: Երիտասարդ կինը, կանխազգալով, որ երկար ապրելու հնարավորություն չի ունենա, որոշում է որդու համար հարմար ընտանիք գտնել: Որդուն ոչինչ չասելով՝ Իննան սկսում է պայքարել հիվանդության դեմ ու ապագա ընտանիք փնտրել որդու համար:
Այդպիսի ընտանիք նրան հաջողվում է գտնել: Օլգան ու Սերգեյն ապահովված են եւ սիրում են միմյանց, նրանց միայն մի բան է պակասում՝ երեխա: Շուտով Միտյան լրացնում է այդ բացը: Միտյայի նոր «ծնողները» իր հանդեպ բարի ու հոգատար են գտնվում, թանկարժեք նվերներ են տալիս, եւ երեխան նրանց հանդեպ վստահությամբ է լցվում՝ դեռեւս չիմանալով, որ նրանք իր ապագա ծնողներն են լինելու:
«Կողքիդ կլինեմ» ֆիլմն ունի նաեւ հեռուստատեսային տարբերակ, որտեղ գլխավոր հերոսուհին չի մահանում, այլ՝ փորձում է որդուն հետ վերցնել իր նոր ծնողներից:
Ֆիլմը ռեժիսոր Պավել Ռումինովի համար նաեւ անձնական նշանակություն ունի: Հայտնի է, որ ռեժիսորի երկու ծնողներն էլ մահացել են քաղցկեղից:
Ռումինովը Ռուսաստանում առավել հայտնի է իր՝ «Մարդը, որը լռում էր», «Վերջնաժամկետ», «Մահացած դուստրեր» թրիլերներով: 2012 թվականին նա նաեւ նկարել է «Դա պարզապես հիվանդություն է» քաղցկեղի մասին պատմող վավերագրական ֆիլմը:
Աշոտ ԱԹԱՅԱՆ
