Հուլիսի 3-ին Կոմիտասի անվան կամերային երաժշտության տանը Թալալյան եղբայրների անվան միջազգային ամենամյա 4-րդ փառատոնի շրջանակներում կայացավ ԱՄՆ-ում բնակվող մեր հայրենակից կոմպոզիտոր Հայկ Բոյաջյանի 75-ամյա հոբելյանին նվիրված համերգը:
Համերգին իր ներկայությամբ պատվել էր կոմպոզիտորը:
Համերգի ընթացքում հնչեցին կոմպոզիտոր Հայկ Բոյաջյանի ստեղծագործություններ` «Կանտիկլ N2» թավջութակի և դաշնամուրի համար (պրեմիերա), նվիրված «Արս լունգա» դուետին, կատարեց «Արս լունգա» դուետը (Ջուլիետա Վարդանյան-դաշնամուր, Արամ Թալալյան-թավջութակ), «32 վարիացիա Բախի թեմայով» դաշնամուրի համար (պրեմիերա), կատարեց Ջուլիետա Վարդանյանը, «Քաղաքավարության կանոններ» սոպրանոյի և դաշնամուրի համար (խոսք` Լեոն Դամասի), կատարեցին` Գայանե Գեղամյանը (սոպրանո), Աննա Ճուղուրյանը (դաշնամուր), «Հայկական կանտիկլ» դաշնամուրի համար (հայաստանյան պրեմիերա), կատարեց Արմեն-Լևոն Մանասերյանը (դաշնամուր), լարային կվարտետ N2 «Ազատ» (հայաստանյան պրեմիերա), կատարեց «Թալալյան» կվարտետը, Թերեզա Նաչարյան (1 ջութակ), Ռիմա Միրզոյան, (2 ջութակ), Յանա Դարյան (ալտ),Արամ Թալալյան, (թավջութակ):
Թալալյան եղբայրների անվան միջազգային ամենամյա 4-րդ փառատոնի շրջանակներում հունիսի 26-հուլիսի 23-ը նախատեսվում է համերգային ծրագրերի շարք (փառատոնի ծրագիրը կցված է մամուլի հաղորդագրությանը, 2-րդ էջում):
Կարդացեք նաև
Հայկ Բոյաջյանը Գրեմմիի մրցանակակիր մրցանակակիր կոմպոզիտոր է: Ծնվել է 1938 թվականին, Փարիզում: Փոքր տարիքում գաղթել է Բուենոս Այրես, Արգենտինա, որտեղ սովորել է Լիստի կոնսերվատորիայում: 1958 թվականին տեղափոխվել է ԱՄՆ: Ներկայում ապրում է Լեքսինգթոնում, Մասաչուսեթս: ԱՄՆ-ում երաժշտական ուսումը շարունակել է որպես հատուկ ուսանող` Նոր Անգլիայի կոնսերվատորիայում, ապա` Բրանդեյս համալսարանում: Ուսուցիչներից են` Բ. Բալցին, Ս.Շիֆրինը, Ա.Լուսիերը և Է.Քոհենը:
Բոյաջյանը Հայաստանի կոմպոզիտորների և երաժշտագետների միության անդամ է, ASCAP միության անդամ, Մաք Դոուել Քոլոնիի անդամ և այլն: Գրեմիի մրցանակի է արժանացել Դաշնամուրային երրորդ սոնատի համար: մրցանակներ է ստացել ASCAP-ից, Լեքսինգթոնի արվեստի խորհրդից և այլն:
Գրել է տարբեր ժանրերում` կամերայինից մինչև սիմֆոնիկ: Ստեղծագործություններից շատերը կատարվել են աշխարհի բազմաթիվ երկրներում և ձայնագրվել են հայտնի ստուդիաներում: Երաժշտական ստեղծագործությունների և բանաստեղծությունների մի մասը հրատարակվել են:Ստեղծագործություններն ընդգրկում են դաշնամուրային, երգեհոնային պիեսներ, ձայնի և դաշնամուրի համար, երգչախմբի համար գրված գործեր, կամերային գործեր` փայտյա փողային, պղնձյա փողային, լարային գործիքների տարբեր համակցություններով, սիմֆոնիկ ստեղծագործություններ` սիմֆոնիաներ, նախերգանք, օրատորիա և այլն:
«ՍՓՐԻՆ ԳՐՈՒՊ» PR ընկերություն
Լուսանկարը Armenpress-ի
