Ադրբեջանից բռնագաղթած փախստականների շուրջ 25 տարի բարձրաձայնվող խնդիրների մասին այսօր Հայաստանի գրողների միությունում կրկին խոսեցին փախստականների հարցերով զբաղվող հ/կ-ներ ու անհատներ՝ ՀԴԿ-ի կազմակերպած հասարակական խորհրդարանի հանրային լսումների ժամանակ:
Բարձրացված նույնանման բազմաթիվ խնդիրների մեջ առանձնացվեց այն, որ
Ռուսաստանի հայերի միության նախագահ Արա Աբրահամյանն Ավան համայնքում երկու շենք է գնել, նվիրել նույն շենքերում ապրող փախստականներին, ինչը, ըստ լսումների մասնակիցների, թվաց, թե օրինակ կլինի եւ մեզ մոտ ապրող մեծահարուստները կհետեւեն Արա Աբրահամյանին, սակայն այդպես չեղավ:
Նշվեց նաեւ, որ հերիք չէ Հայաստանում ապրող փախստականները անտարբերության են մատնված, նրանց ճակատագրով հետաքրքրվող չկա, կառավարությունը ոչինչ չի անում, դեռ մի բան էլ դրսից իրենց որպես օգնություն հատկացված գումարներն են մսխում: Որպես օրինակ նշվեց, որ Բրազիլիայի կառավարությունը հիսուն հազար ԱՄՆ դոլար է տրամադրել, սակայն առ այսօր անհայտ է, թե այդ գումարներն ինչ են եղել:
Կարդացեք նաև
Ջուլիետա Եփրեմյանի ներկայացմամբ` հայ փախստականներից երես են թեքել ոչ միայն դոնոր կազմակերպությունները, այլեւ ՀՀ-ն:
Նա հավաստիացրեց, որ «Ադրբեջանից բռնագաղթված 360 հազար փախստական ժամանել է Հայաստան, բայց նրանց քանակն իրականում ոչ թե 360 հազար է, այլ կես մլն-ից ավելի, եւ նրանք տեղ են գտել աշխարհի տարբեր երկրներում ու բոլորն էլ ունեն փոխհատուցում պահանջելու իրավունք, բայց 25 տարի է անցել ու ոչ մեկն այս մասին չի խոսում: Պահանջող կողմ պետք է լինի, որ Ադրբեջանն էլ փոխհատուցում տա…»:
Եվա ՀԱԿՈԲՅԱՆ
