Այսօր Հայաստանի Գրողների միությունում կայացավ Հայաստանի դեմոկրատական կուսակցության նախաձեռնությամբ ձեւավորած Հասարակական խորհրդարանի հանրային լսումները, որի նպատակը Ադրբեջանից բռնագաղթած փախստականների շուրջ 25 տարի բարձրաձայնվող խնդիրների մասին բարձրաձայնելն ու դրանց լուծումը գտնելն է:
ՀԴԿ առաջնորդ Արամ Սարգսյանը ներկայացնելով խնդրով հետաքրքրվածներին, նշեց, որ իրենց համար մեծ զարմանք է, որ 25 տարվա ընթացքում, այս հիմնահարցերը որ առկա էին ՀՀ-ում, դեռեւս լուծված չեն, փախստականները ապաստան չունեն, ապրում են անհարիր պայմաններում, եւ 2009 թվից առ այսօր բյուջեն չի նախատեսում գումար՝ այս մարդկանց համար շենքեր կառուցելու նպատակով, ինչի հետեւանքով էլ նրանք լքում են երկիրը:
«Մի շարք նամակներ ենք ուղարկել, նախարարներին, այս հարցերը բարձրացնելով եւ մենք ամեն օր շարունակում ենք նամակներ ստանալ մարդկանցից… Ինձ ամեն օր փաստեր են ներկայացնում, այն մասին, թե ինչ է կատարվում հանրակացարաններում, տանիքներ են փլուզվում…»,- ասաց Սարգսյանը, հավելելով, որ նախատեսում են ձեւավորել առաջարկությունների շարք, որը կուղղվի կառավարությանն ու ՀՀ նախագահին, որպեսզի տեսնեն, որ փախստականների հարցը դեռեւս լուծված չէ:
Եվա ՀԱԿՈԲՅԱՆ
