Գյումրու Սավոյան 9 հասցեում գտնվող «Արյան փոխներարկման կայան»-ի նախկին շենքը «Պաթոլոգո-անատոմիական լաբորատորիա» վերակառուցելու որոշման առնչությամբ հարկ ենք համարում պարզաբանել, որ «Գյումրու պաթոլոգո-անատոմիական լաբորատորիա» ՓԲԸ-ն լինելով մարզում միակ կազմակերպությունը սպասարկում է Շիրակի մարզի ազգաբնակչությանը: Բոլորին հայտնի է, որ լաբորատորիայի շենքը գտնվում է անմխիթար վիճակում: Խնդրի անհապաղ լուծման անհրաժեշտությամբ պայմանավորված ՀՀ Շիրակի մարզպետարանը դիմել էր ՀՀ նախագահին, ՀՀ վարչապետին եւ ՀՀ առողջապահության նախարարին: Հարցը կարգավորելու համար գումարներ հատկացվել են արդեն Հայաստանի Սոցիալական ներդրումների հիմնադրամի միջոցներից: Հատուկ կազմված հանձնաժողովը, որում ընդգրկված են եղել շահագրգիռ բոլոր կազմակերպությունների ներկայացուցիչները, ուսումնասիրել եւ քննարկել են «Պաթոլոգո-անատոմիական լաբորատորիայի» շենքի կառուցման մի շարք առաջարկություններ: Համակողմանի քննարկման արդյունքում ընտրվել է Սավոյան 9 հասցեում գտնվող «Արյան փոխներարկման կայան»-ի նախկին շենքը, որի վերակառուցման արդյունքում մարզն ունենալու է ամենաժամանակակից սարքավորումներով հագեցած հաստատություն:
Առկա է ՀՀ առողջապահության նախարարության համաձայնությունը:
Պետք է փաստել, որ բնակչությանը սպասարկելու առումով նպատակահարմար է գտնվել նշված շենքի ընտրությունը, քանզի այն չի հակասում որեւէ քաղաքաշինական դրույթի: Շենքի վերականգնման նախագիծը մշակվում է նորմատիվատեխնիկական փաստաթղթերի պահանջներից ելնելով եւ ՀՀ օրենսդրությամբ սահմանված կարգով կենթարկվի փորձաքննության:
Սանիտարա-համաճարակային կանոնների եւ նորմերի համաձայն էլ լաբորատորիաները տեղակայվում են բնակելի եւ հասարակական շենքերից առնվազն 30մ հեռավորության վրա, այս նորմերը եւս շինարարական նախագծում հաշվի են առնվել եւ խախտված չեն:
Կարդացեք նաև
Համաշխարհային պրակտիկայում եւս որեւէ փաստ չկա, որ այսօրինակ կառույցները պարտադիր է կառուցել քաղաքից դուրս կամ լրիվ անմարդաբնակ վայրերում, ճիշտ հակառակ` մի շարք քաղաքներում դրանք կառուցված են անգամ ամենախիտ բնակեցված թաղամասերում:
Բնակիչների այն մտահոգությունների հետ կապված էլ, թե կառույցի գործունեությունը կարող է վատ ազդել տարածքի մարդկանց կենսագործունեության վրա, քանզի անընդմեջ տեսադաշտում է լինելու կառույցի աշխատանքը, պետք է նշել` նոր դրահերձարանն ունենալու է բարձր պարիսպներ, իսկ թափոնների վերաբերյալ անհանգստություններն ընդհանրապես անտեղի են, քանզի վերջին տարիներին մարզում բժշկական թափոնների հավաքման հետ կապված որեւէ խնդիր չի արձանագրվել, քանզի դրանք համապատասխան պայմանագրային պարտավորություններով պայմանավորված մարզից տեղափոխում է հատուկ կազմակերպության կողմից:
Այս բոլոր փաստարկներից հետո պետք է ընդգծել, որ նոր լաբորատորիայի կառուցումը հանգեցնելու է մարզում բժշկական այս ծառայությունների առավել որակյալ եւ ժամանակակից չափորոշիչներին համապատասխան իրականացմանը:
Շիրակի մարզպետարան
