Մանկավարժագիտության դոկտոր Սերգեյ Մանուկյանը մամուլում քանիցս հանդես է եկել ԿԳ փոխնախարար Մանուկ Մկրտչյանի (լուսանկարում) «Ուսուցման կազմակերպման կոլեկտիվ եղանակի իրականացման մեթոդաբանությունը, տեսությունը եւ պրակտիկան» մանկավարժական գիտությունների դոկտորի գիտական աստիճանի հայցման ատենախոսության դեմ: Նշենք, որ Մկրտչյանն այն անցյալ տարի պաշտպանել է Երեւանի պետական մանկավարժական համալսարանի (ԵՊՄՀ) 020 մասնագիտական խորհրդում:
Սերգեյ Մանուկյանն այդ հարցով դիմել էր նաեւ ԲՈՀ, որն էլ ատենախոսությունը վերադարձրել էր պաշտպանության խորհուրդ՝ աշխատանքը կրկնակի նայելու: Խորհուրդը, սակայն, կրկին դրական եզրակացություն էր տվել:
«Առավոտը» կապվեց խորհրդի անդամներից մանկավարժական գիտությունների դոկտոր, պրոֆեսոր Իգոր Կարապետյանի հետ: Նա նշեց, որ խորհուրդը երկրորդ անգամ եւս կողմ է քվեարկել Մանուկ Մկրտչյանի ատենախոսությանը եւ գտել, որ նա արժանի է դոկտորի գիտական աստիճանին: Խոսելով քննադատության գործնական եւ տեսական բաժինների մասին, պարոն Կարապետյանը նշեց. «Տեսական մասը նշանակում է, թե ինչ տեսություններ են աշխատանքի հիմքում ընկած եւ այդ տեսությունները ինչքանով են արդիական: Օրինակ՝ ես գտնում եմ, որ այսպես կոչված մանկավարժության՝ Արեւմուտքում ընդունված ինտերակտիվ, փոխներգործուն մեթոդները զուգահեռաբար զարգացել էին խորհրդային մանկավարժության մեջ նույնպես… Ու Մանուկ Մկրտչյանը կարողացել է խորհրդային ռուսական, խորհրդային հայկական փորձը ոչ միայն ուսումնասիրել, ամփոփել, այլեւ առաջարկել է իր մեթոդները, ուսուցման եղանակները: Նա մեծ քանականությամբ մանկավարժական տերմիններ է ներմուծել հայոց լեզու, զարգացրել մանկավարժական ենթալեզուն»: Անդրադառնալով Մանուկ Մկրտչյանի ընդդիմախոսի այն դիտարկմանը, թե նրա մեթոդը «քանդում» է դաս-դասարանային համակարգը, խորհրդի անդամը ասաց. «Նախ Մանուկ Մկրտչյանն այդպիսի առաջարկություններ չի անում, որ պետք է հրաժարվենք դաս-դասարանային համակարգից, նման միտք չի հնչել: Կա այն միտքը, որ դպրոց հասկացության առաջ գալը եղել է ուսուցման անհատական եղանակ, հետո՝ կոլեկտիվ, որը նորից տանում է ուսուցման անհատականացման: Ինչ վերաբերում է քննադատությունների գործնական մասին, հավելեմ, որ, օրինակ, երկկոմպլեկտ դպրոցներում, որտեղ տարբեր տարիքի եւ դասարանների երեխաներ են, այդ մեթոդն արդեն արդյունավետորեն կիրառվել է: Ինչ վերաբերում է թռիչքային, մասնավոր դպրոցներին, որ ստեղծվել են ՀՀ-ում կամ ՌԴ-ում, այդ մեթոդով վաղուց աշխատում են: Կոլեկտիվ ուսուցման եղանակը չի բացառում այլ եղանակների կիրառումը, հեղինակը չի ասում, որ իր մեթոդից բացի, ուրիշ մեթոդ չկա: Ի դեպ, ինչպես մյուս, այնպես էլ այս մեթոդի կիրառման արդյունավետությունը կախված է կոնկրետ դպրոցից, մանկավարժների աշխատանքից, ներդնողից եւ խորհրդային հայացք է, թե այդ մեթոդը վտանգավոր է»:
Հետաքրքրվեցինք, իր կարծիքով՝ ինչի՞ց է նեղացած Սերգեյ Մանուկյանը: Կարապետյանը հայտնեց, որ ժամանակին Մանուկյանը եղել է 020 մասնագիտական խորհրդի անդամ, սակայն երբ որեւէ բուհում այլեւս չի դասավանդել, զրկվել է անդամությունից: Մեր զրուցակցի ձեւակերպմամբ, հարցը կարելի է դիտարկել նաեւ միջանձնային հարաբերությունների դաշտում. «Սերգեյ Մանուկյանին հավանաբար թվում է, թե Մանուկ Մկրտչյանն է մեղավոր դրանում, չնայած Մանուկյանի գործողությունների պարագայում, չի բացառվում, որ կան նրան դրդողներ»:
Կարդացեք նաև
ԳՈՀԱՐ ՀԱԿՈԲՅԱՆ
«Առավոտ» օրաթերթ
