«Գործող նախագահ Սերժ Սարգսյանը ամբողջ ազգի առաջ ցուցումներ տվեց դատախազությանը, թե ինչ քանակով է պետք հարուցել քրգործեր, ինչ ծավալի հանցագործությունների մասին է պետք խոսել՝ ըստ էության կանխատեսելով քննության արդյունքները: Նա ճնշում գործադրեց հրապարակավ ՎՊ-ի վրա»,- այսօր հրավիրած ասուլիսում ՀԱԿ խմբակցության ղեկավար Լեւոն Զուրաբյանը այսպիսի գնահատական տվեց Սերժ Սարգսյանի վերջին խորհրդակցությանը:
Ըստ նրա, Վերահսկիչ պալատի պես՝ Սահմանադրական ինստիտուտը հավասարացրեցին հողի հետ. «Սերժ Սարգսյանի գործողությունները հիմք են ստեղծում նրան իմպիչմենթի ենթարկելու համար: Սա հանցագործությունների երկար շարքում եւս մեկ հանցագործություն էր՝ Սահմանադրության դեմ: Մենք ԱՄՆ-ում չենք, երբ սենատորները կքվեարկեին իմպիչմենթի օգտին: Բայց մենք պատրանք չունենք, մենք հասկանում ենք, որ այս խորհրդարանով դա հնարավոր չէ»:
Հռիփսիմե ՋԵԲԵՋՅԱՆ
