«Զինվոր» համակարգող խորհրդի նախագահ Մարգարիտա Խաչատրյանն այսօր Aravot.am-ի հետ զրույցում իր անվստահությունը հայտնեց զինդատախազության նախաձեռնության մասին:
Ըստ զինվորական դատախազության տարածած հաղորդագրության, աշխատանքային խումբ է ստեղծվելու, որը պետք է ուսումնասիրի ՀՀ զինված ուժերում մահվան ելքով քրեական գործերը:
Մարգարիտա Խաչատրյանի դիտարկմամբ՝ «Չեմ կարծում, որ հասարակության վստահությունը դրանից կմեծանա: Ես ինքս առանձնապես հույսեր չեմ փայփայում, որ կբացահայտվի որեւէ բան: Պիտի անկախ մարմին լինի, որ բացահայտի: Իմ տղայի փորձը ես ունեմ, ինչ տառապանքով եմ հասնում ամեն ինչի: Ես տառապելով ապրում եմ այսօր, որովհետեւ գործը բացահայտված չէ: Ես մեծ ցավ եմ ապրում, երբ տեսնում եմ բողոքի դուրս եկած զոհվածների մայրերի: Մեծ վիշտ եմ ապրում: Նրանց համար այդ նախաձեռնությունը հույս չի կարող լինել»:
Տիկին Խաչատրյանը դեռ չգիտի՝ կներգրավվի՞ այդ աշխատանքային խմբում, թե՞ ոչ: Նա ասաց, որ հրավեր դեռ չի ստացել ու դեռ պետք է քննարկվեն, թե որ հասարակական կազմակերպություններն են, որ կարող են մասնակցել այդ աշխատանքներին. «Մենք համագործակցում ենք ՊՆ-ի հետ: Ովքեր 3 տարվա բանակում աշխատելու փորձ ունեն, պիտի հրավիրվեն: Այսօր կոլեգիայի նիստից հետո պարզ կդառնա, թե ովքեր են ընդգրկված»:
Կարդացեք նաև
Մարգարիտա Խաչատրյանի խոսքերով՝ «Նրանց շատ լավ ճանաչում եմ եւ ցավում եմ, որ ոչ մի բան չի փոխվելու այդ աշխատանքներից: Ոչ մեկիս գործն էլ չի բացահայտվելու»:
Մեր հարցին՝ այն, որ այդ աշխատանքային խումբը պետք է ուսումնասիրի միայն այն քրգործերը, որոնցով ամփոփիչ որոշումները կայացվել են 2011-ի հունվարի 1-ից հետո, դա կասկածելի չէ՞՝ Մարգարիտա Խաչատրյանը պատասխանեց. «Իհարկե, կասկածանք կա: Եթե 98 թվականի գործը չի բացահայտվել, ինչի՞ են վերցրել 2011-ից հետո քրեական գործերը: Նախնական վարկածով ռազմական ոստիկանությունը, նախնական վարկածով դեպքի վայրի քննությունը, եթե ի սկզբանե խեղաթյուրված է, մինչեւ վերջ քրեական գործերը խեղաթյուրված էլ գնում են»:
Հռիփսիմե ՋԵԲԵՋՅԱՆ
Լուսանկարը՝ https://zinvorhk.wordpress.com/ -ից
