Ամռան շոգին մինչեւ 3 լիտր ջուր պետք է խմել, կրեմային թխվածքներ, լցնովի պաղպաղակ ուտելուց եւ գնելուց էլ` խուսափել: Այսօր այսպիսի մի քանի խորհուրդ տվեց առողջապահության նախարարության Պետական հիգիենիկ եւ հակահամաճարակային տեսչության վարակիչ եւ ոչ վարակիչ հիվանդությունների համաճարակաբանության բաժնի պետ Լիլիթ Ավետիսյանը:
Մասնագետը «Զարկերակ» մամուլի ակումբում մեկ առ մեկ թվարկեց սննդի կամ առօրյայում հանդիպող բոլոր այն հնարավոր վտանգները, որոնք կարող են մարդու օրգանիզմում աղիքային վարակ առաջացնել. «Ամռանը վարակիչ հիվանդությունների մեխանիկական փոխանցողները` ճանճերը, շատանում են, եւ եթե մենք չհետեւենք աղբահանությանը բակերում, տանը սննդի մնացորդները մնան սեղանին, ճանճերը սկսում են տարածել այդ հարուցիչները: Ճաշը, որն ամբողջ օրը պատրաստված է եղել եւ մնացել է սեղանին, այնտեղ նույնպես, արդեն մի քանի ժամ հետո, արդեն որոշակի երեւույթներ են տեղի ունենում եւ դրանցից խուսափելու համար, այն պետք է պահել սառնարանում»:
Տիկին Ավետիսյանը կոչ արեց ամռանը կրեմային թխվածքներ էլ չգնել, եթե դրանք առանց սառնարանային պայմանների են պահվում:
Նրա խոսքերով, պետք է անընդհատ հեղուկ օգտագործել, որպեսզի օրգանիզմը չջրազրկվի. «Հեղուկը մեր օրգանիզմը պաշտպանվում է գերտաքացումից:
Կարդացեք նաև
Իսկ հեղուկը մեր օրգանիզմում կենսական անհրաժեշտություն է»:
Մասնագետը նաեւ խորհուրդ տվեց ճիշտ տեղերից ձեռք բերել սննդամթերքը եւ այն ոչ մի դեպքում փողոցից չգնել. «Ձեռքերի հիգիենան շատ կարեւոր է, սնվելուց առաջ պարտադիր պետք է լվացվել, երեխաներին չպետք է թույլատրել, որ բակում խախալիս կամ փողոցում սնվել, առանց լվացվելու: Արեւից պաշտպանվելու համար պետք է գլխարկ կրել, ոչ մի դեպքում արեւի ուղիղ ճառագայթների տակ մի կանգնեք, հանգստի գնալիս միրգ-բանջարեղենն էլ նախապես լվանալ եւ նախատեսված տարաներով տանել բնության գիրկ: Բնության գիրկ առանց լվանալու տարած միրգն ու բանջարեղենը ոչ մի դեպքում չլվանալ ոռոգման ջրով, հատկապես ձմերուկը պետք է լվանալ խմելու ջրով, որովհետեւ դանակով կտրելիս կարող է այդ հարուցիչը ընկնել մեջը»:
Մասնագետի խորհուրդներից ամենաշատը, որ ոգեւորություն առաջացրեց լրագրողների շրջանում, այն էր, որ ամռան տապին խորհուրդ չի տրվում շատ աշխատել եւ ժամը 12-ից մինչեւ 5-ն անց կես ցանկալի է, որպեսզի մարդը պառկած վիճակում անցկացնի:
Տիկին Ավետիսյանի տվյալներով, այս տարի աղիքային վարակիչ հիվանդությունների աճ չի գրանցվել:
Լուսինե ԲՈՒԴԱՂՅԱՆ
