Ինչպես արդեն հաղորդել ենք, այսօր Երևանում մեկնարկեց Եվրոպայի խորհրդի նախարարների կոմիտեում ՀՀ նախագահության շրջանակներում անցկացվող «Իրավունքի գերակայության եվրոպական չափորոշիչները և իշխանությունների հայեցողության սահմանները Եվրոպայի խորհրդի անդամ երկրներում» խորագրով Երևանյան համաեվրոպական խորհրդաժողովը, որը կազմակերպել են ՀՀ ազգային ժողովը, ՀՀ սահմանադրական դատարանը, ՀՀ արտաքին գործերի նախարարությունը, ՀՀ մարդու իրավունքների պաշտպանը:
Եվրախորհրդի Վենետիկի հանձնաժողովի նախագահ Ջիանի Բուքիքիոն իր ելույթի խոսքում նշեց. «Ժամանակակից պետությունը պիտի լինի ճկուն, որպեսզի արագ արձագանքի տեղի ունեցող փոփոխություններին: Սակայն նաև պետք է մշակել մեխանիզմներ, որոնց միջոցով հնարավոր կլինի կառավարել այդ ճկունությունը»:
Ջ. Բուքիքիոն կարևորեց օրենքի առաջ խտրականության բացառումը, մարդու իրավունքների պաշտպանությունը: Նա նաև հատուկ շեշտեց այն հանգամանքը, որ իշխանական շրջանակները լինեն հասանելի, որ անհատականությունները կարողանան դրսևորել իրենց, լսելի լինի քաղաքացու ձայնը:
Ջ. Բուքիքիոն նշեց, որ օրենքի և իրավունքի գերակայության շրջանակները փոխկապակցված են:
Կարդացեք նաև
Հունգարիայի ՍԴ նախագահ Պետր Պաչոլայի զեկույցը «Սահմանադրական բարեփոխումը Հունգարիայում. եվրոպական պարտավորությունները և ազգային ինքնիշխանությունը» թեմայով էր: Նա առանձնացրեց մարդու անձնական կյանքի գաղտնիության հարգումը, ֆինանսական եկումուտների մասին տեղեկատվությունը և այլն:
Մարդու իրավունքների եվրոպական դատարանի դատավոր Ալվինա Գյուլումյանն էլ նշեց մարդու իրավունքների պաշտպանության առումով իշխանությունների պարտականությունները և շեշտեց, որ իշխանական կուսակցությունները պիտի ավելի մեծ դերակատարություն ունենան այն հարցում, որ պետությունը ակտիվ քայլեր ձեռնարկի մարդու իրավունքների խախտման դեպքում նախազգուշական մեխանիզմների ձեռնարկման համար:
Տաթև ՀԱՐՈՒԹՅՈՒՆՅԱՆ
