ԱԺ նիստերի սրահում քիչ առաջ սկսվեց Եվրոպայի խորհրդի նախարարների կոմիտեում ՀՀ նախագահության շրջանակներում անցկացվող Երեւանյան համաեվրոպական խորհրդաժողովը: Օրակարգում են հարցեր, որոնք վերաբերում են իրավունքի գերակայության եվրոպական չափորոշիչներին եւ իշխանությունների հայեցողության սահմաններին Եվրոպայի խորհրդի անդամ երկրներում:
Բացման խոսքով հանդես եկան ԱԺ նախագահ Հովիկ Աբրահամյանը, Մարդու իրավունքների եւրոպական դատարանի նախագահ Դին Շպիլման, Վենետիկի հանձնաժողովի նախագահ Ջիանի Բուքիքիոն:
Իր բացման խոսքում ԱԺ նախագահ Հովիկ Աբրահամյանն ասաց. «Նման միջոցառման անցկացումը փաստում է Հայաստանի հավատարմությունը եվրոպական արժեքներին»: ԱԺ նախագահը շնորհավորեց գալիք համապետական տոնի՝ ՀՀ Սահմանադրության օրվա առթիվ:
«Թեման արդիական է, բազմակողմանի քննարկման ժամանակ խորը քննարկումներ կլինեն»,-ասաց ԱԺ նախագահը:
Կարդացեք նաև
ԱԳ նախարար Էդուարդ Նալբանդյանն անդրադարձավ միջմշակութային երկխոսության խրախուսման , ժողովրդավարության խթանման, մարդու իրավունքների պաշտպանության, ռասիզմի դեմ հարցերին:
ՀՀ նախագահի՝ խորհրդաժողովի մասնակիցներին ուղղված բացման խոսքը ընթերցեց նախագահի աշխատակազմի ղեկավար Վիգեն Սարգսյանը: «Իրավունքի գերակայության հիմնախնդիրներին նվիրված համաժողովը մնայուն արժեք կբերի մարդկանց իրավունքների արդյունավետ երաշխավորման համար»,-ասված է նախագահի բացման խոսքում:
ՍԴ նախագահ Գագիկ Հարությունյանն իր «Իրավունքի գերակայության տեղն ու դերը մարդու եւ քաղաքացու սոցիալական վարքագծում» զեկույցում կարեւորեց հետեւյալ հարցադրումները. որքանով է բանաձեւած իրավունքի գերակայության սկզբունքը, որքանով է այն քաղաքական, իրավական մշակույթի մաս դարձել, որքանով է այն կիրառվում եւ այլն:
Ըստ ՍԴ նախագահի պետք է հստակեցվեն իրավունքի գերակայության առաջնահերթությունները, իշխանության սահմանափակման ռեալ հնարավորությունները:
Գ.Հարությունյանը իր խոսքը համեմեց Մխիթար Գոշի Դատաստանագրքից:
«Իրավունքի գերակայության սկզբունքի ճանաչումը ինքնաճանաչման դրսեւորում է: Ոչ իրավական միջամտությունը անհատի սոցիալական վարքագծում չի կարող հանգեցնել սոցիալական համերաշխության»:
