Հունահռոմեական ըմբշամարտի Հայաստանի ազգային հավաքականը նախորդ գիշեր է վերադարձել Ալուշտայից, որտեղ համատեղ ուսումնամարզական հավաք էր անցկացնում Ուկրաինայի ընտրանու հետ: Իսկ դրանից առաջ մեր առաջատար ըմբիշները Իտալիայում եւ Մարիուպոլում մասնակցել էին միջազգային մրցաշարերի:
Հավաքականի գլխավոր մարզիչ Լեւոն Ջուլֆալակյանն Aravot.am-ի հետ զրույցում ասաց. «Իտալիայում մրցագորգ մտած մեր յոթ ըմբիշներից վեցը, բացի 84 կգ քաշային Մաքսիմ Մանուկյանից, մեդալ նվաճեցին: 60 կգ քաշային կարգում Ռոման Ամոյանը ճանաչվեց 3-րդը, 66 կգ-ում պատվո պատվանդանն ըստ հաջորդականության զբաղեցրին Սասուն Ղամբարյանը, Արամ Ջուլֆալակյանը, Տիգրան Թորոսյանը, իսկ Արսեն Ջուլֆալակյանը՝ 74 կգ եւ Արթուր Ալեքսանյանը՝ 96 կգ, դարձան հաղթող:
Այնտեղից հավաքականը մեկնեց Մարիուպոլ, որտեղ մասնակցեց «Ազավմաշի Գավաթ» միջազգային մրցաշարին: Այնտեղ Ռոման Ամոյանը հանդես գալով իր՝ 55 կգ քաշային կարգում, չունեցավ հավասարը, Գեւորգ Սահակյանը երկրորդը ճանաչվեց 66 կգ քաշային կարգում, իսկ Ռաֆիկ Մանուկյանը՝ 74 կգ եւ Սարգիս Տոնոյանը՝ 96 կգ, բավարարվեցին երրորդ տեղով»:
Աշոտ ՀԱԿՈԲՅԱՆ
