Թեեւ Սուքիասյանը հերքեց, թե վարչապետն ու Նավասարդ Կճոյանն առնչություն ունեն օֆշորային ընկերության հետ, եւ որ ինքը նրանց անուններն առանց վերջիններիս գիտության է գրել որպես ընկերության բաժնետեր՝ իր բիզնեսն ապահովելու համար, սակայն գնալով հիմնավորվում է ինչպես վարչապետի, այնպես էլ Կճոյանի մասնակցությունն օֆշորային խարդավանքներում: Վերջին ապացույցը Կիպրոսի դատախազի հայտարարությունն էր, ըստ որի՝ բացառվում է առանց անձի իմացության իր երկրում կազմակերպություն բացելը: Եվ կրկին Էջմիածինը լռում է: «Բացի հրապարակումներից, որոշակի ուսումնասիրություններ պատկան մարմինների կողմից հրապարակված չեն, թե որքանով է դա իրականությանը համապատասխանում կամ ոչ»,- մեր հարցին ի պատասխան, ասաց Մայր Աթոռի դիվանապետ Արշակ սրբազանը: Այսինքն, Էջմիածնի համար արժանահավատ չե՞ն թեմայի առնչությամբ մամուլի հրապարակումները` հարցրինք: «Անշուշտ, արժանահավատ չեն կարող լինել հոդվածները, հրապարակումները, քանի դեռ նրանք համապատասխան մարմինների կողմից չեն հաստատվել կամ հերքվել: Դրա համար մենք պետք է նախընտրեինք մեր մոտեցումները, մեր կեցվածքն արտահայտել այն ժամանակ, երբ որ հավաստի կդառնան հրապարակումների մեջ արտահայտված տեսակետները»,-ասաց սրբազանը: Եթե հաստատվի Նավասարդ Կճոյանի մասնակցությունն օֆշորային սկանդալին, Էջմիածինը հանդես կգա՞ հայտարարությամբ` փորձեցինք ճշտել: «Անպայման, անշուշտ: Հիմա չեմ ուզում «եթե»-ներով խոսել, երբ նման իրավիճակ ստեղծվի, անշուշտ, համապատասխան տնօրինումներն ըստ այդմ կկատարվեն»,-եզրափակեց սրբազանը:
Սոնա ՀԱՐՈՒԹՅՈՒՆՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
