Այսօր Aravot.am-ի հետ զրույցում Սյունիքի նախկին մարզպետ Սուրիկ Խաչատրյանի որդու` Տիգրան Խաչատրյանի պաշտպան Ռուբեն Սահակյանը հայտնել է, թե պետք է Բուդաղյանների փաստաբան Հայկ Ալումյանից հետաքրքրվել` ինչու է պնդում, թե Արտակ Բուդաղյանը պետք է տուժող ճանաչվի և այսպիսի կարծիք է հայտնել. «Ճիշտ կլիներ, որ իրենից հարցնեիք` ինչու է պնդում, որ տուժող պետք է ճանաչվի: Նախաքննությունն ընթացքի մեջ է, ինքը գործի նյութերին այնպես ծանոթ չէ, ինչպես` ես: Ինչո՞ւ է Ալումյանը այդ կարծիքին եկել, ես առայժմ հիմնավորումներ չեմ տեսնում եւ գտնում եմ, որ նախաքննական մարմինը շատ ճիշտ է վարվել»:
Aravot.am-ը Հ. Ալումյանից հետաքրքրվեց՝ համաձա՞յն է այս դիտարկումների հետ: Նա պատասխանեց. «Տուժող ճանաչվում են հենց նախաքննության ընթացքում, երբ պարզվում է, որ հանցագործությամբ տվյալ անձին պատճառվել է ֆիզիկական, նյութական կամ բարոյական վնաս: Հենց այդ պահին է անձը տուժող ճանաչվում, այլ ոչ թե նախաքննության ավարտման փուլում: Իսկ հիմա նախաքննության ընթացքն է, և վաղուց բոլորին հասկանալի ու պարզ է, որ իմ վստահորդ Արտակ Բուդաղյանը ստացել է ֆիզիկական, հրազենային վնասվածք: Այսքանը բավարար է, որ անձին տուժող ճանաչեն: Ինչ վերաբերում է մյուս կողմի դիտարկումներին, ապա նա պաշտպանություն է իրականացնում և հասկանալի են իր մոտեցումները»:
Ռ. Սահակյանը նաև կարծիք է հայտնել, թե Ա. Բուդաղյանին մեղադրանք առաջադրելու բավարար հիմքեր կան: Այս մասին Հ. Ալումյանն ասաց հետևյալը. «Ով նման բան է ասում, ճիշտ չի ասում»:
Ըստ Հ. Ալումյանի` միտումներ գործընթացի հենց սկզբից են նկատվում: Նա մանրամասնեց. «Միտումը երևում է առաջին փուլերից, երբ մոնտաժված տեսանյութ դրվեց շրջանառության մեջ, զինդատախազը շատ տենդենցիոզ և իրականությունից հեռու հայտարարություններ արեց: Այդ շղթայի մեջ է պետք դիտարկել այս վերջին իրադարձությունները, երբ իմ վստահորդը տուժող չի ճանաչվում: Երբ մենք տեսնում ենք, որ պետության անունից հանդես եկող բարձրաստիճան պաշտոնյաներից մեկը փաստորեն իր հայտարարություններով հենց սկզբից փորձել է ուղղորդել քննությունը, ընդ որում, ոչ ճիշտ ուղղությամբ: Հավաբանար դա միտված է մյուս կողմին օգնելուն, կամ փրկելուն, հասարակական կարծիքը հետզհետե հաշտեցնելու այն մտքի հետ, որ մեղմ մոտեցում է լինելու մյուս կողմի նկատմամբ: Ինձ համար տարօրինակ է, որ մամուլի հետ շփումներն իր վրա վերցրել է զինդատախազը, փաստորեն նա իր վրա է վերցրել դատախազության մամուլի ծառայության գործառույթը և սկսել է լոբբիստական գործունեություն իրականացնել: Նա անում է այնպիսի հայտարարություններ, որոնք, որպես կանոն, անում են մեղադրյալների պաշտպանները: Նույնիսկ այդ պարագաներում էլ մեղադրյալների պաշտպանները ձեռնպահ են մնում այդ փուլում այդ աստիճան միանշանակ հայտարարություններ անելուց»:
Կարդացեք նաև
Տաթև ՀԱՐՈՒԹՅՈՒՆՅԱՆ
