Այսօր Երևանի պետական համալսարանի աստվածաբանական ֆակուլտետում, Հայ Առաքելական եկեղեցու և ԿԳՆ միջև հաստատված պայմանավորվածության համաձայն, անցկացվեց «Հայոց եկեղեցու պատմություն», «Հայոց լեզու և գրականություն», «Հայոց պատմություն» և «Բնագիտական» ( «Ֆիզիկա», «Քիմիա», «Կենսաբանություն») առարկաների ուսուցիչների և դասվարների մրցույթի հանրապետական փուլը:
Ըստ կարգի, մրցույթի մարզային /քաղաքային/ փուլի մասնակիցների թեկնածությունները ներկայացնում են դպրոցների տնօրենները՝ մանկավարժական խորհուրդների որոշմամբ: Յուրաքանչյուր մասնակից գնահատող հանձնաժողովին է ներկայացնում դպրոցի մանկավարժական խորհրդի կողմից տրված երաշխավորագիր-բնութագիր, որտեղ նշվում են տեղեկություններ ուսուցչի կրթության, ունեցած կոչումների, մասնագիտական և կազմակերպչական կարողությունների մասին:
Կրթության ազգային ինստիտուտի նախակրթական և տարրական բաժնի վարիչ Կարինե Հարությունյանի փոխանցմամբ` նախնական փուլն իրականացվել է մարզերում, որտեղից ընտրվել է մեկական հոգի.«Ըստ էության, այսօր պետք է ներկա լինեին բոլոր մարզերի ներկայացուցիչները, սակայն Շիրակում և Կոտայքի մարզում որևէ մեկը հաղթող չի ճանաչվել, որի արդյունքում այսօր բացակայում են, մնացյալ ինը մարզերից ներկա են»:
Նրա խոսքով` կարևորը մրցույթում հաղթանակը չէ, որի մասին բազմիցս ասել է. «Ես միշտ էլ իրենց հետ զրուցելիս, ասում եմ, որ չպետք է գալ անպայման հաղթելու նպատակով, կարևորն այստեղ ոչ այնքան հաղթանակ նվաճելն է, որքան մասնագիտական մասով ճանաչել, գնահատելն է, ինչպես նաև՝ իմանան, թե որ հարցերն են արդիական և իրենց խոցելի տեղերի վրա աշխատեն և մասնագիտական զարգացում ապրեն»:
Կարդացեք նաև
Վերջինս լինելով հանձնաժողովի նախագահ և ունենալով իրավունք կազմելու համապատասխան քննական հարցաշարը՝ ասաց, որ թեստում տեղ են գտել, թե’ տեսական, և թե’ պրակտիկ հարցեր. «Եթե մենք ընտրում ենք հանրապետության տարվա լավագույն ուսուցիչ, ապա, բնականաբար իրենց դասավանդման առօրյա փորձից մի փոքր բարձր կանգնած ուսուցիչներ պետք է լինեն: Շատերը խուսափում են մասնակցել մրցույթին` վախենալով հեղինակազրկվել: Մաղթում եմ բոլոր ուսուցիչներին, որ դիտարկեն սա ոչ թե հաղթանակի ամբիոն, այլ դիտարկեն պարզապես մրցակցություն` մասնագիտական դաշտում»:
Քրիստինա ՄԻՐԶՈՅԱՆ
