Հունիսի 28-ին Aravot.am-ը հրապարակել էր Երիտասարդ քիմիկոսների ասոցիացիայի նախագահ Սարգիս Հայոցյանի «Հանրային խորհրդի, գիտնականների և ԲՈՀ-ի նախագահի մասին» հոդվածը:
Այսօր ստացել ենք այդ հրապարակման մեջ բարձրացված որոշակի հարցերի վերաբերյալ Հանրային խորհրդի տեսակետը, որը ներկայացրել է ՀՀ Հանրային խորհրդի մամուլի պատասխանատու Անի Գասպարյանը:
«Հանրային խորհուրդը ստեղծման օրվանից բազմաթիվ դիմումներ է ստացել (այդ թվում նաև 2011 թվականի սեպտեմբերի 30-ին ստացված Ա-265 նամակը, որի վերաբերյալ ձեր կայքէջում եղել է հրապարակում) գիտության և կրթության ոլորտի խնդիրների՝ մասնավորապես գիտության ֆինանսավորման բարձրացման վերաբերյալ:
2011 թվականին այդ հարցը Հանրային խորհրդում համակողմանիորեն քննարկվել է «Գիտության զարգացման հեռանկարները, գիտության ֆինանսավորման և կառավարման հիմնախնդիրները» թեմայով կազմակերպված լայն քննարկման ժամանակ, որին մասնակցել են նաև Գիտությունների ազգային ակադեմիայի նախագահ Ռ. Մարտիրոսյանը, Գիտության պետական կոմիտեի նախագահ Ս. Հարությունյանը, ակադեմիկոսներ, երիտասարդ գիտնականներ: Քննարկման մասնակիցները համակարծիք են եղել այն տեսակետին, որ գիտության զարգացումը կախված է ոլորտի ֆինանսավորման ավելացման հետ:
Կարդացեք նաև
Հարցը Հանրային խորհրդում բարձրացվել է նաև Գիտության և կրթության ոլորտի խնդիրներին նվիրված այլ քննարկումների ընթացքում՝ մասնավորապես ֆիզիկայի ինստիտուտի կարգավիճակի, Գիտության պետական կոմիտեի կողմից գիտական թեմաների բաշխման ընթացքի և արդյունքների վերաբերյալ քննարկումների ժամանակ: Այդ ամենը լայնորեն լուսաբանվել է զանգվածային լրատվամիջոցների կողմից:
Տարվա ընթացքում գիտության ոլորտի հիմնախնդիրներին նվիրված նիստերի և քննարկումների արդյունքում ձևավորված հստակ տեսակետն ամրագրվել է Հանրային խորհրդի 2011 թ. տարեկան հաշվետվության մեջ՝ հետևյալ ձևակերպմամբ. «Հանրային խորհուրդը գտնում է, որ ՀՀ կառավարությունը պետք է վերանայի գիտության ֆինանսավորման կարգը՝ էապես ավելացնելով հատկապես հիմնարար գիտություններին հատկացվող ֆինանսական միջոցները»:
Հաշվետվությունն ուղարկվել է ՀՀ նախագահին:
Ինչ վերաբերում է արդյունքներին, ապա Հանրային խորհուրդը գտնում է, որ այսօր դրանք գոհացուցիչ չեն և պատրաստակամություն է հայտնում շարունակելու գիտության ոլորտի՝ մասնավորապես գիտության ֆինանսավորման ավելացման հարցի վերաբերյալ քննարկումները՝ շահագրգիռ բոլոր կողմերի մասնակցությամբ, քանի դեռ ոլորտում արդյունքները շոշափելի չեն»:
