Հայաստանի Հանրապետությունում մարդկանց շահագործման (թրաֆիքինգի) հարցերով խորհրդի այսօրվա նիստում ՀՀ փոխվարչապետ, խորհրդի նախագահ Արմեն Գեւորգյանը, մինչեւ օրակարգային հարցերին անցնելը, շնորհակալություն հայտնեց խորհրդում ընդգրկված բոլոր պետական մարմինների, հասարակական կազմակերպությունների ներկայացուցիչներին` վերջին տարիների համատեղ արդյունավետ աշխատանքի համար, որի արդյունքում Հայաստանն իր դիրքերը բարելավել է ԱՄՆ պետքարտուղարության 2012 թ. մարդկանց թրաֆիքինգի մասին զեկույցում` տեղ գտնելով երկրների առաջին խմբում:
«Կարեւոր է, որ իրականացված աշխատանքը գնահատվում է, բայց այդ գնահատականը մեզ չպետք է հանգստացնի. սա վկայում է այն մասին, որ խնդիրը ՀՀ իշխանությունների ուշադրության կենտրոնում է, բայց անելիքներ դեռ կան, եւ միջազգային հանրության, քաղաքացիական հասարակության, համապատասխան մարմինների աջակցությամբ առկա խնդիրները եւս պետք է իրենց լուծումներն ստանան»,- նշեց Ա. Գեւորգյանը:
Նիստում խորհրդին կից միջգերատեսչական աշխատանքային խմբի ղեկավար Վահրամ Կաժոյանը ներկայացրեց թրաֆիքինգի ենթարկված անձանց համար փոխհատուցման համակարգի ստեղծման եւ Ազգային ուղղորդման կարգի վերանայման ուղղությամբ կատարված աշխատանքների ընթացքը: Նշվեց, որ ՀՀ ոստիկանության կողմից մշակվում են Ազգային ուղղորդման կարգի փոփոխություններ, որոնք ուղղված են լինելու զոհերի նույնականացման ընթացակարգերի պարզեցմանը: ՀՀ աշխատանքի եւ սոցիալական հարցերի նախարարությունում քննարկվում է զոհերի աջակցության հիմնադրամի ձեւավորման միջոցով փոխհատուցման համակարգի ստեղծման հարցը: Համապատասխան փաստաթղթերի նախագծերը խորհրդին կից աշխատանքային խմբին կներկայացվեն մինչեւ սեպտեմբեր: Վ. Կաժոյանը նշեց, որ պայմանավորվածություն է ձեռք բերվել նախագծերը միջազգային փորձագիտական կարծիքի ներկայացնելու վերաբերյալ:
Ա. Գեւորգյանն առաջարկեց անհրաժեշտ նախագծերը եւ օրենսդրական փաթեթները պատրաստել նախանշված ժամկետներում` ԱԺ աշնանային նստաշրջանում ներկայացնելու եւ արդեն 2014թ-ից դրանց կիրառությունն ապահովելու համար: Նա նաեւ կարեւորեց նախագծերի քննարկումներին ոլորտային ՀԿ-ների մասնակցությունը:
Կարդացեք նաև
Վ. Կաժոյանը խորհրդի անդամներին ներկայացրեց նաեւ ԱՄՆ պետքարտուղարության 2012 թ. մարդկանց թրաֆիքինգի մասին զեկույցում ներկայացված առաջարկները` միաժամանակ նշելով, որ դրանց մեծ մասն արդեն իսկ ընդգրկված է «Հայաստանի Հանրապետությունում 2013-2015 թթ. մարդկանց շահագործման (թրաֆիքինգի) դեմ պայքարի կազմակերպման ազգային ծրագրում», մի մասն աշխատանքային խմբի կողմից քննարկման փուլում է, որից հետո կներկայացվի համապատասխան գերատեսչություններին` անհրաժեշտ քայլեր ձեռնարկելու համար:
Ա. Գեւորգյանը մասնավորապես անդրադառնալով հարկադիր աշխատանքի հնարավոր զոհերի հայտնաբերման ոլորտին վերաբերող առաջարկներին` կարեւորեց աշխատանքային տեսուչների ուսուցումների կազմակերպումը: Նա նաեւ հանձնարարեց համապատասխան մարմինների հետ քննարկել ՀԿ-ների ներկայացուցիչների առաջարկները` նման դեպքերի բացահայտման համար անսպասելի տեսչական ստուգումների իրականացման հնարավորության, նաեւ ճամփորդական գործակալությունների ոլորտում հնարավոր ռիսկերի կանխման նպատակով աշխատանքների իրականացման վերաբերյալ:
Նիստում քննարկվեց նաեւ 2014 թ. թրաֆիքինգի դեմ պայքարին ուղղված ծրագրերի եւ միջոցառումների իրականացման համար անհրաժեշտ ֆինանսական միջոցների հատկացման հարցը: Տեղեկացվեց, որ ՀՀ աշխատանքի եւ սոցիալական հարցերի, սպորտի եւ երիտասարդության, առողջապահության նախարարությունների կողմից արդեն համապատասխան հայտերը ներկայացվել են` Պետական միջնաժամկետ ծախսերի ծրագրում եւ 2014թ. բյուջեի նախագծում հաշվի առնելու համար:
ՏԿՆ հասարակայնության հետ կապերի բաժին
