Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը քիչ առաջ քննեց Մատաղիսի գործով հայցվոր կողմի ներկայացրած
ապացույցները: Մատաղիսի գործով արդարացվածներն ընդդեմ Գագիկ Ջհանգիրյանի գործով հայցվորները որպես ապացույց ներկայացրել էին
Գագիկ Ջհանգիրյանի հարցազրույցները «Իրավունք» շաբաթաթերթի եւ Aravot.am կայքում հրապարակված եւ ilur.am-ին տված հարցազրույցի տեսագրությունը:
Հայցվորներից Արայիկ Զալյանը տեսանյութի մասին կարծիք հայտնեց, որ այն պատրաստված է դեկտեմբերի տասնութին, երբ կայացվել էր իրենց արդարացման դատավճիռը եւ պնդեց, որ Գ. Ջհանգիրյանը, ամենայն հավանականությամբ, այդ հարցազրույցը կազմակերպել էր իր տանը՝ միտումնավոր նրանց վիրավորելու համար:
Առարկեց Գ. Ջհանգիրյանի պաշտպան Վահե Հովսեփյանը. «Ինչ կապ ունի՝ որտեղ է եղել՝ տանը, դրսում, թե՝ այլուր: Ինչպես մյուս ապացույցների , այս ապացույցի վերաբերյալ էլ պնդում ենք մեր դիրքորոշումը, այստեղ միտում չի եղել վիրավորելու»:
Կարդացեք նաև
Հայցվոր Ա. Զալյանն էլ պնդեց՝ միտումնավոր վիրավորելու դիտավորություն ենք տեսնում:
Դատարանը լսեց կողմերի կարծիքները եւ հրապարակեց հաջորդ դատական նիստի օրը: Հուլիսի տասնվեցին կհրապարակվի դատական վճիռը:
Արփինե ՍԻՄՈՆՅԱՆ
