Այս տարվա մայիսին, նախորդ տարվա նույն ժամանակահատվածի համեմատ, արդյունաբերության ոլորտը 7.4%-ի անկում է ունեցել
Չնայած որ փոքր ու միջին բիզնեսի ոլորտը Հայաստանի տնտեսության կարեւոր ճյուղերից է, սակայն, ինչպես այսօր «Փաստարկ» ակումբում վստահեցրեց տնտեսագետ Վազգեն Սաֆարյանը, այս ոլորտում էական աճ այդպես էլ չի ապահովվում:
Հայաստանի ապրանքարտադրողների միության նախագահ պարոն Սաֆարյանը որոշակի համեմատություն կատարեց տարբեր երկրների տնտեսության մեջ ՓՄՁ-ի ներգրավվածության առումով: Ըստ այդմ, արեւմտյան երկրներում ՓՄՁ-ներն ապահովում են բյուջեների 70-75%-ը, Ռուսաստանում`15%-ը, Հայաստանում` 9%-ը:
Վազգեն Սաֆարյանի կարծիքով` ՓՄՁ-ի համար անհրաժեշտ է շրջանառության հարկի 3.5%-ի շեմը նվազեցնել, եւ դարձնել 3 %:
Կարդացեք նաև
Պարոն Սաֆարյանի ներկայացմամբ` այս տարվա մայիսին, նախորդ տարվա նույն ժամանակահատվածի համեմատ, արդյունաբերության ոլորտը 7.4%-ի անկում է ունեցել, բայց այս հանգամանքը մասնագետը պայմանավորեց միջազգային շուկայում պղնձի գների նվազմամբ:
Տնտեսագետն առաջարկում է զարգացնել թեթեւ արդյունաբերությունը` տրիկոտաժի, կոշիկի եւ բրդի արտադրությունը. «Եթե տարեկան 3500-4000 տոննա կաշի, մորթի ենք արտահանում, մեծ մասը Թուրքիա, Չինաստան եւ Վրաստան, եւ եթե կարողանանք հումքը պահել տեղում` մաքսային արգելքներ եւ այլն, ու կարողանանք կաշին տեղում մշակել, զարգացնել կոշիկի արտադրությունը, ապա տարեկան ներմուծված 10 միլիոն զույգ կոշիկից, 5 միլիոնը տեղում կարտադրվի, 3000 նոր աշխատատեղ կապահովվի»:
Նելլի ԲԱԲԱՅԱՆ
