Այսօր Վիեննայում Շվեյցարիայի և Սերբիայի արտգործնախարարները ԵԱՀԿ մշտական խորհրդին ներկայացրին իրենց նախագահության առաջնահերթությունները: Շվեյցարիան կստանձնի ԵԱՀԿ նախագահությունը 2014-ին, իսկ Սերբիան՝ 2015-ին: Շվեյցարիայի ԱԳ նախարար Դիդիե Բուրքալթերն իր ելույթում նշեց, որ չեզոքությունն ընկած է Շվեյցարիայի արտաքին քաղաքականության հիմքում: Առաջնահերթությունների շարքում նա առանձնացրեց կոոպերատիվ անվտանգությունն ու հասարակական երկխոսությունը: Այնուհետև նշեց. «Հնարավոր չէ ապահովել մի երկրի անվտանգություն, եթե մյուսը չունի այդ անվտանգությունը»:
ԱԳ նախարարի համար առաջնահերթությունների շարքում է նաև տնտեսական համագործակցությունը: Նախարարը նշեց, որ ԵԱՀԿ 57 երկրների միջև անվտանգության և համագործակցային դաշտի ապահովումը բազմաթիվ մարտահրավերներ է առաջացնում:
Առաջիկա անելիքների մասին խոսելով`Դ. Բուրքալթերն ասաց, որ Սերբիան հիմնական խաղացողներից է, որը կամուրջ է Եվրոպայի արևմտյան և արևելյան հատվածների միջև: Շվեյցարիայի ԱԳ նախարարն իրենց կարգախոսն այսպես բնութագրեց. «Մեր նպատակն է ստեղծել անվտանգության հանրույթ ի շահ բոլորի»: Նա թվարկեց այն երեք արժեքները, որոնցով առաջնորդվում են` անվտանգություն, պատասխանատվություն և ազատություն: Տարածաշրջանային առաջնահերթությունների շարքում Շվեյցարիայի ԱԳ նախարարը շեշտեց Հարավային Կովկասում քաղաքական երկխոսության ստեղծման անհրաժեշտությունը: Նա նշեց, որ մեծապես աջակցելու են Մինսկի խմբի աշխատանքներին, օգնելու նրանց նոր գաղափարներով մտածել հակամարտությունների կարգավորման հարցում:
Նաև շեշտեց Հարավային Կովկասում ռազմական թափանցիկության ապահովման, սպառազինության վերահսկողության, անվտանգության համակարգում կառավարման բարեփոխումների անհրաժեշտությունը: .Շվեյցարիան իր նախագահության տարվա ընթացքում ծրագրում է կազմակերպել երիտասարդական ֆորում, ահաբեկչության դեմ պայքարին նվիրված քննարկում:
Կարդացեք նաև
Սերբիայի ԱԳ նախարար Իվան Մրկիչը ևս շեշտեց այն, որ Շվեյցարիայի հետ աշխատելու են համատեղ աշխատանքային ծրագրով: Նա խոսեց «Հելսինկի+40» գործընթացի մասին ու նշեց. «Մեզ սպասվում են երկար և շատ հավանական է թեժ քննարկումներ մի շարք խնդրահարույց թեմաների շուրջ, ինչպիսիք են երկարաձգվող հակամարտությունները, նոր համազգային սպառնալիքներն ու մարտահրավերները, սպառազինությունների վերահսկողությունը, մարդու իրավունքները: Եվ սրանք ընդամենը մի քանիսն են»: Նա կարևորեց Բալկաններում տարածաշրջանում շարունակական անվտանգության և կայունության ապահովումը: Այս համատեքստում առաջ քաշեց Կոսովոյի հարցը` փաստելով, թե այս հիմնախնդրում դեռ գոյություն ունեն չլուծված խնդիրներ:
Տաթև ՀԱՐՈՒԹՅՈՒՆՅԱՆ
