«2010-2011թթ. ՆՄԿՈՒ հաստատությունների շրջանավարտների աշխատաշուկայում ներգրավվածության հետազոտության արդյունքում, պարզ է դարձել, որ քոլեջների շրջանավարտների մոտ 55 տոկոսը նախնական և միջին մասնագիտական կրթական հաստատություններ ավարտելուց հետո աշխատանք է գտնում` աշխատանք փնտրելու 6-ամսյա շրջանում»,-այսօր այս մասին «Գոլդեն Թուլիփ» հյուրանոցի «Ձմեռային պարտեզ» սրահում «Աշխատաշուկայում նախնական և միջին մասնագիտական կրթության համակարգի 2010-2011թթ. շրջանավարտների ներգրավվածության մասին» հետազոտության արդյունքներին անդրադառնալով ասաց Հայաստանում ՄԱԶԾ մշտական ներկայացուցչի ժամանակավոր պաշտոնակատար տկն. Սոֆի Կեմխաձեն:
Վերջինիս փոխանցմամբ` հարցմանը մասնակցել են 651 շրջանավարտներ, 25 ուսումնարաններ, 60 քոլեջներ, ինչպես նաև Հայաստանի 400 խոշորագույն գործատուներ:
«Ուսումնասիրությունը տրամադրել է նաև տեղեկատվություն շրջանավարտների գենդերային և սոցիալ-տնտեսական իրավիճակի վերաբերյալ, որը հնարավորություն է տալիս գնահատելու աղքատության նվազման միտումները»,-ասաց Կեմխաձեն, հավելելով, որ ՄԱԶԾ-ն շուրջ յոթ տարի է, ինչ ակտիվորեն ներգրավված է Հայաստանի նախնական և միջին մասնագիտական կրթության ոլորտի բարեփոխումների իրականացմանը:
ՀՀ կրթության և գիտության նախարար պրն. Արմեն Աշոտյանն էլ նշեց, որ դեռ տարիներ առաջ նախնական և միջին մասնագիտական կրթական ոլորտը գերակա է ճանաչվել կառավարության կողմից, որի արդյունքում իրականացվել են մի շարք բարեփոխումներ. «Այսօրվա հետազոտության արդյունքները ցույց են տալիս, որ բարեփոխումներն իրենց շոշափելի արդյունքն են տալիս: Մասնագիտական կրթության ոլորտում վերացվել են ընդունելության քննությունները և ուսանողները հնարավորություն ունեն ատեստատի միջին գնահատականով ընդունվել իրենց նախընտրած մասնագիտությունների գծով, ինչպես նաև ծնողները ավելի բծախնդիր են դարձել և մասնագիտական կրթությունն ավելի պահանջելի է դարձել, որտեղ լինում են անգամ մրցութային իրավիճակներ` շնորհիվ այն հանգամանքի, որ կառավարությունը 50 տոկոսով ավելացրեց անվճար տեղերի քանակը: Երրորդ հանգամանքը, որ ակնհայտ դարձավ հետազոտության արդյունքներից`միջին մասնագիտական կրթությունը դարձել է աշխատանքի տեղավորման լուրջ երաշխիք»,-ասաց նախարարը:
Կարդացեք նաև
Աշոտյանը նշեց, որ հետազոտության արդյունքներում ակնհայտ են դարձել նաև խնդիրները. «Հիմնական խնդիրները կապված են ուսանողների սոցիալական վիճակի հետ: Ցանկալի է, որպեսզի մենք մոտ ապագայում կարողանանք շարունակել աշխատանքները՝ հանրակացարանների բարելավման, ուսանողների սոցիալական տարաբնույթ ծառայությունների մատուցման ուղղությամբ»:
Ինչ վերաբերում է գործատուների պահանջներին, ապա նախարարն ասաց. «Ցավոք, ոչ բոլոր գործատուներն են Հայաստանում այսօր պատրաստ կրթությունը դիտարկել որպես ներդրումային շահեկան ոլորտ, և մենք այդ մշակույթը ամբողջությամբ կայացած Հայաստանում համարել չենք կարող»:
Քրիստինա ՄԻՐԶՈՅԱՆ
