Վտանգավոր թափոնների կառավարման մասով Վերահսկիչ պալատի արձանագրած թերացումների հետ բնապահպանության նախարարությունը համամիտ է` սակայն այս գերատեսչության պատասխանատուները հավաստիացնում են, որ բացերը օրենքում են: Այսօր կառավարությունում բնապահպանության նախարարի առաջին տեղակալ Սիմոն Պապյանը ներկայացրեց, թե ՎՊ-ի հայտնած դժգոհությունն ինչումն է կայանում: Նախարար Արամ Հարությունյանն արձակուրդում էր:
Այս օրերին գերատեսչությունների ղեկավարները մեկը մյուսի հետեւից հանդես են գալիս պարզաբանումներով, այն բանից հետո, երբ հանրապետության նախագահ Սերժ Սարգսյանը, օրերս, որոշ հարցերում ՎՊ-ին «սխալ հանեց»: «Բնապահպանության նախարարությունում, իսկապես, այսօր խնդիր է թափոնների կառավարման հարցը: ՎՊ-ն գտել էր, որ թափոնների մասին օրենքում պետք է փոփոխություններ կատարել եւ հստակեցնել մշակում եւ պահում կարգը»,-պարզաբանեց պարոն Պապյանը: Ըստ նրա, թափոնների դասակարգման մասով հստակ ամրագրված է, որ շինարարական, արտադրական եւ կենցաղային աղբը հանդիսանում է վտանգավոր թափոն, սակայն փոխնախարարի խոսքերով, օրենքում փոփոխություններ կատարելու կարիք կա, քանի որ հենց այդ օրենսդրական բացերի պատճառով պատշաճ կերպով չի հավաքագրվում կենցաղային աղբի բնապահպանական վճարները:
Բնապահպանության համար խնդիր է նաեւ չորրորդ դասի թափոն հանդիսացող կենցաղային աղբի չտեսակավորված լինելը: Տեսակավորումն, ըստ փոխնախարարի, ենթակա է լիցենզավորման: Գումարային չարաշահումներ ՎՊ-ն չի արձանագրել, ինչպես պարոն Պապյանն է նշում, իրենց` բյուջեից թափոնների կառավարման համար տարեկան հատկացվող 11 միլիոն դրամը ծախսում են արդյունավետ:
Նուբարաշենի աղբանոցից ազատվելու միակ ելքը, Սիմոն Պապյանի կարծիքով, ճապոնական աղբամշակմամբ զբաղվող ընկերության կողմից աղբանոցը տնօրինելն է, որը հետաքրքրված է աղբանոցից արտազատվող ջերմոցային գազերի բիզնեսով:
Հարցին, ատկատ կա՞ ոլորտում, փոխնախարարը պատասխանեց, որ իրենց բոլոր ծրագրերը թափանցիկ են եւ հիմնական միջոցները, որոնք ուղղվում են Սեւանի խնդիրներին, ձկնային պաշարների համալրմանը, ատկատների չեն ենթարկվում:
Կարդացեք նաև
Լուսինե ԲՈՒԴԱՂՅԱՆ
