Այսօր «Ժուռնալիստների տանը» կայացած քննարկման ժամանակ Արցախյան ազատամարտի եւ կանանց միության նախագահ, «Մարտական խաչ» առաջին աստիճանի շքանշանակիր Միհրան Մովսիսյանը եւ կազմակերպության անդամները խոսեցին «Երկրապահ կամավորականի կարգավիճակի մասին» օրենքից:
Մովսիսյանի խոսքով` ԱԺ-ում ընդունվեց օրենք, ինչն ըստ նրա՝ առաջընթաց է վերջին քսան տարում:
«Ընդունված օրենքը լայնածավալ ներկայացման կարիք ունի հանրության շրջանում:
Շատերը չեն ուզում հիշել, որ 95 թվականներին կային նաեւ կամավորական ջոկատներ, որոնք մեծ դեր խաղացին, չեմ ուզում ազատամարտիկների մեջ սեպ խրել, բայց կան մարդիկ, որոնք չար խոսակցություններ են վարում՝ ասելով, թե ինչու օրենքը չի կոչվում «ազատամարտիկների մասին օրենք», բայց այս օրենքը, իմ կարծիքով, պետք է դառնա հիմնական օրենք բոլորի համար»,- ասաց Մովսիսյանը: Նրա խոսքով՝ ընդունված օրենքը վերաբերվում է բոլորին եւ պետք չէ ավելորդ խոչընդոտներ ստեղծել:
Կարդացեք նաև
«Երկրապահ կամավորականի կարգավիճակի մասին» օրենքը հստակ սահմանում է երկրապահ կամավորականի կարգավիճակը:
Մովսիսյանի խոսքով` Հայաստանում անձից է կախված ամեն ինչ, ու այդպես է եղել նաեւ այս օրենքի հետ կապված հարցը` «տվյալ նախագծի հետ կապված՝ Մանվել Գրիգորյանի եւ գեներալ Սեյրան Սարոյանի շնորհիվ այս նախագիծը կյանքի կոչվեց եւ դարձավ օրենք, ինչը սրանից հինգ-տասը տարի առաջ չէր ստացվում անել»:
Ըստ Մովսիսյանի, որոշ մարդիկ ասում են, ինչո՞ւ է օրենքի անունը «երկրապահ», նա հարցնում է` «բա երկրապահ չլիներ, ի՞նչ լիներ`փռչոտնե՞ր դնեինք անունը, ինչպես ժամանակին էին մեզ ասում, եւ ինչպես ասես, որ չէին կոչում… Պետք չի մեր օրենքը դարձնել մատի փաթաթան, բառերից պետք չէ կախվել»:
Նա նաեւ հավելեց, որ 89-94թթ Երկրապահ կամավորականների միություն գոյություն չուներ, կային ֆիդայիներ, կամավորներ եւ հետագայում ստեղծվեց Երկրապահ կամավորականների միությունը, որպեսզի միավորի:
Եվա ՀԱԿՈԲՅԱՆ
