ԿԱԻ տնօրենի համոզմամբ, չպետք է փոխհատուցեն
Aravot.am-ը մարզերի ուսուցիչներից դժգոհություն է ստացել, որ մասնակցում են ուսուցիչների վերապաստրաստման դասընթացներին, սակայն ի տարբերություն անցյալ տարվա, այս տարի ճանապարհածախս չեն տրամադրում: «Տարբեր մարզերից ստիպված ենք 10 օր շարունակ գալ Երեւան, օրական ծախսելով միջինը 2000-2500 դրամ, չհաշված, որ մինչեւ ժամը 16-ը պետք է մի բան ուտել եւ խմել: Դե, իսկ լեռնային շրջաններում աշխատող ուսուցիչները, ինչպես եւ ես, ստացած աշխատավարձերը չենք էլ հասցնում տուն, այն մի կերպ բավականացնում է վարկերի ամսական մարմանը: Երբ հարցնում ենք, թե այս տարի ինչու՞ պետք է մենք հոգանք մեր ծախսերը, ոչ մի կոնկրետ պատասխան չեն տալիս, գումար չկա եւ վերջ: Երեւանից մասնակցող ուսուցիչների համար դա մեծ խնդիր չէ, բայց կոնկրետ ինձ համար 10 օրում 25000-30000 դրամ ծախսելը մեծ շռայլություն է:
Անգամ ԿԳ նախարարին եմ գրել Ֆեյսբուքով, չի պատասխանել: Ի դեպ, դասընթացներն անցկացվում են Աշտարակում, Երեւանի Կրթության ազգային ինստիտուտում, Երեւանի համար 6 դպրոցում»,- նշեց ուսուցիչներից մեկը:
ԿԳ նախարարությունից խոստացան ավելի ուշ պաշտոնապես պատասխանել:
Կարդացեք նաև
Aravot.am-ը կապվեց նաեւ Կրթության ազգային ինստիտուտի (ԿԱԻ) տնօրեն Նորայր Ղուկասյանի հետ: Պարոն Ղուկասյանն ասաց,որ վերապատրաստված 7000 ուսուցչից մի քանիսի դժգոհությանը նորմալ է վերաբերվում: «Ինչու պետք է փոխհատուցվի նրանց ճանապարհածախսը, նման պարտադիր պայման չկա, ընդհանրապես ճանապարհածախսը գործուղման ծախսերի բաղադրիչներից է: Գործողում կարող է ուղարկել միայն այն հիմնարկը, որտեղ մարդը աշխատում է, տվյալ դեպքում խոսքը վերաբերում է դպրոցներին: Հունիս ամիսը ուսուցիչների համար աշխատանքային ամիս է, նրանք վարձատրվում են,: Աշխարհի ցանկացած երկրում գործուղումը որոշակի հանձնարարությամբ մարդուն իր բնակավայրից հեռու ուղարկելն է: Այդ դեպքում գործուղողը, ով մարդուն ուղարկում է, ինքը պետք է այդ հարցերով զբաղվի: Ինչ վերաբերում է նախկինում ճանապարհածախսը փոխհատուցելուն, այլ ծրագրերով է արվել: Ուսուցիչները պետք էիրենց մասնագիտական զարգացումն ապահովեն, որպեսզի ատեստավորվեն»,- ասաց ԿԱԻ տնօրենը: Ապա հավելեց. «Ենթադրենք ուսուցիչն ապրում է Երեւանում, աշխատում է Աշտարակում, որեւէ մեկը նրան հո ճանապարհածախս չի՞ տալիս, մարդը համաձայնել է այդպես աշխատել, գնում-աշխատում, հետ է գալիս»:
Հետաքրքրվեցինք, թե կոնկրետը ո՞ր ծրագրի մասին է խոսքը, որի հաշվին ժամանակին փոխհատուցել են ուսուցիչների ճանապարհածախսը: Պարոն Ղուկասյանը չհիշեց. «Այնքա՜ն ծրագիր ենք իրականացրել, որ հիմա շփոթ է առաջացնում»:
Նա փաստեց, որ որոշ քաղաքներում քաղաքապետարանները լուծել են վերապատրաստվող ուսուցիչների տրանսպորտի հարցը. «Օրինակ Մարտունի, Վարդենիս տեղաշարժվելու համար ավտոբուս են տրամադրել: Դա ընդամենը աջակցություն է, օրենքի տառին համապատասխան նման բան գոյություն չունի»:
Գոհար ՀԱԿՈԲՅԱՆ
