Կառավարության տեղեկատվության եւ հասարակայնության հետ կապերի վարչությունն այսօր հաղորդագրություն տարածեց բնապահպանության նախարար Արամ Հարությունյանի վաղը կայանալիք ասուլիսի մասին: Սակայն քիչ անց էլ հաղորդագրություն տարածեց, որ վաղը բնապահպանության նախարարի պաշտոնակատար Սիմոն Պապյանի ասուլիսն է: Այս լուրը ուշագրավ է նրանով, որ Սիմոն Պապյանը փոխնախարարն է, սակայն նա ներկայացված է որպես նախարարի պաշտոնակատար, իսկ պաշտոնակատար լինում են, ասենք` օրինակ նախարարի հրաժարականի դեպքում:
Բնապահպանության նախարար Արամ Հարությունյանն արդյոք հրաժարակա՞ն է տվել, թե ոչ, փորձեցինք պարզել նախարարի մամուլի քարտուղար Հայկ Հակոբյանից: Վերջինս վստահեցրեց, որ բնապահպանության նախարար Արամ Հարությունյանը վաղվանից ընդամենը արձակուրդի է անցնելու, իսկ սահմանված կարգով, նախարարի արձակուրդի դեպքում նախարարի պաշտոնակատար է լինում առաջին տեղակալը, այս դեպքում` Սիմոն Պապյանը: Հայկ Հակոբյանի փոխանցմամբ` նախարարը 15 օր կվայելի իր արձակուրդը. Արամ Հարությունյանն առայժմ որոշել է հանգստանալ Հայաստանում:
Նելլի ԲԱԲԱՅԱՆ
