«Ամերիկայի Ձայն». Ցուցարարները թալանել են Եգիպտոսի նախագահ Մոհամեդ Մորսիի գլխավորած «Մահմեդական եղբայրություն» կուսակցության գլխավոր գրասենյակը
Եգիպտոսի մայրաքաղաքում ցուցարարները գրոհել և թալանել են երկրի նախագահ Մոհամեդ Մորսիի գլխավորած «Մահմեդական եղբայրություն» կուսակցության գլխավոր գրասենյակը:
Մի շարք ցուցարարներ երկուշաբթի օրը կոտրել են «Մահմեդական եղբայրության» գրասենյակի պատուհանները, կրակի մատնել այն, ապա հեռացել գրասենյակից՝ տանելով փաստաթղթեր և կահույք:
«Մահմեդական եղբայրության» գրասենյակի աշխատողներն էվակուացվել էին ավելի վաղ, երբ ցուցարարները հարձակում էին մեկնարկել շենքի ուղղությամբ՝ նետելով քարեր և դյուրավառ հեղուկով լցված շշեր: Գրասենյակում այդ ընթացքում գտնվող «Մահմեդական եղբայրության» անդամներն ու աշխատողները հրազենային պատասխան կրակ են բացել:
Կարդացեք նաև
Եգիպտոսի ակտիվիստների համաձայն, ամբողջ երկրում նախագահ Մորսիի պաշտոնաթողությունը պահանջող ցույցերի ընթացքում կիրակի օրվա վերջից սաստկացած խռովությունների հետևանքով զոհվել է առնվազն հինգ մարդ:
Հարյուրավոր ցուցարարներ գիշերվա ընթացքում չեն լքել Կահիրեի կենտրոնական Թահրիր հրապարակը՝ շարունակելով հակակառավարական ցույցերը: Ցույցերի մասնակիցները կոչ են անում գործողություններ ձեռնարկել Եգիպտոսի ներկայիս կառավարության դեմ, որը, ըստ նրանց, փորձում է մենաշնորհ հաստատել պետական իշխանության նկատմամբ՝ միաժամանակ ընդունակ չգտնվելով բարելավելու երկրի ծանր վիճակում գտնվող տնտեսությունը: Շատերը, բացի այդ, զայրույթ են արտահայտում Եգիպտոսում հետզհետե թափ հավաքող հանցագործությամբ, ինչպես նաև չդադարող քաղաքական և կրոնական բռնություններով:
Արմեն Հովհաննիսյան
