Զբոսաշրջիկներին հնարավորություն կընձեռվի օգտվել օդապարուկների վարձույթից, կկազմակերպվեն հետիոտն եւ հեծանվային զբոսանքներ եւ այլն
Այս տարի «ՏաԹեւեր» ճոպանուղին կունենա 150 հազարերորդ հաճախորդը: Այս մասին լրագրողների հետ հանդիպման ժամանակ տեղեկացրեց ճոպանուղու տնօրեն Վահան Մելիքսեթյանը: Տնօրենը ներկայացրեց նոր ծառայությունները, որ կմատուցի ընկերությունը: Ըստ այդմ, ըստ պարոն Մելիքսեթյանի՝ «Այսուհետեւ զբոսաշրջիկներին հնարավորություն կընձեռվի օգտվել օդապարուկների վարձույթից, կկազմակերպվեն հետիոտն եւ հեծանվային զբոսանքներ, ժայռագնացություն, կգործի աուդիոգիդերի վարձույթ»: Պարոն Մելիքսեթյանի ներկայացմամբ՝ ճոպանուղու տոմսերի գինը չի բարձրացել: Տոմսի արժեքը հետադարձով կազմում է 4000 դրամ, իսկ մեկ ուղղությամբ՝ 3000, տեղացիների համար՝ 500 դրամ: Տնօրենի խոսքերով՝ մոտ 60 տեղաբնակ է աշխատում ճոպանուղում: Վահան Մելիքսեթյանի վստահեցմամբ՝ Տաթեւի վանական համալիրին հարակից 6 գյուղերին աջակցություն են ցուցաբերում, նաեւ վանական համալիրին: Տնօրենը խոստացավ, որ վանական համալիրի 1111-րդ ամյակի կապակցությամբ համալիրն ամբողջությամբ վերանորոգված կլինի: Հարցին, թե թանկարժեք բիոզուգարանը, որը չէր աշխատում, ի՞նչ վիճակում է, պարոն Մելիքսեթյանն ասաց. «Թեեւ բիոզուգարանը ճոպանուղուն չի պատկանում, բայց այն արդեն 2 շաբաթ է՝ աշխատում է»:
Ճոպանուղու հարակից տարածքում գործում է նաեւ «Տաթեւատուն» նոր ռեստորանը: Այստեղ, ինչպես վստահեցրեց ռեստորանի տնօրենը՝ «խորոված, քյաբաբ չի լինելու, այլ տեղական բաղադրատոմսերով ուտեստներ»:
Նելլի ԲԱԲԱՅԱՆ
