Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանի նախագահությամբ այսօր պետք է սկսվեր Սարգիս Բժիկյանի բողոքի քննությունը:
74-ամյա բողոքաբերը սպասում է, թե երբ կկատարվի 2010 թ. դատարանի վճիռը, համաձայն որի, իրեն կտրվի իր վաճառած բնակարանի մնացորդ գումարը՝ մոտ 33 միլիոն 760 հազար դրամը:
Սարգիս Բժիկյանը բրոքեր Ռոբերտ Պետրոսյանի մասնակցությամբ վաճառել է իր բնակարանը «Մալխաս Ջազ» ակումբի սեփականատերեր՝ Վահագն Նիկողոսյանին եւ Արսեն Սարգսյանին: Թումանյան-38 շենքի 15 բնակարանը (1932թ-ի կառուցված շենք է) նախնական պայմանավորվածության համաձայն վաճառվելու էր 155 միլիոն ՀՀ դրամով:
Սակայն գնորդները, որոնք կկանչվեն դատական հերթական՝ հուլիսի 12-ին նշանակված նիստին, պարտք են մնացել վերոհիշյալ 33 միլիոն 760 հազար ՀՀ դրամը: Չնայած, 2012թ.նոյեմբերի 28-ին «Մալխաս Ջազ» ակումբի տնօրեն Կարեն Մկրտչյանը նախաքննության մարմնին հայտնել էր, թե դեռեւս 2010թ. օգոստոսի 4-ին Ս.Բժիկյանը հայտարարել է, թե Վահագն Նիկողոսյանն եւ Արսեն Սարգսյանը վճարել են Թումանյան փողոցի առուվաճառքի պայմանագրով նախատեսված ողջ գումարը, վերջիններս միմյանց նկատմամբ որեւէ պարտքուպահանջ չունեն:
Ի դեպ, խոսքը քրեական գործի նյութերում առկա հետեւյալ ստացականի մասին է՝ միջնորդ Ռոբերտ Պետրոսյանի:Ըստ այդ 15.03.2008թ.ստացականի, նշված է.«Գնորդներ Արսեն Սարգսյանից եւ Վահագն Նիկողոսյանից ստացա Երեւան քաղաքի Թումանյան փողոցի 38 շենքի 15 բնակարանը, 03.03.08թ.անշարժ գույքի առուվաճառքի պայմանագրի 5-րդ կետի համաձայն, նախկինում չվճարած գումարի մնացորդը՝ 33 760 000 դրամը վաճառողին ամբողջությամբ փոխանցելու համար»:
Ի դեպ, այսօր դատական նսիստին դատավորը հարցրել է բողոքաբերին՝ Ս.Բժիկյանին, թե որեւէ թղթի տակ ստորագրե՞լ է, թե՝ ոչ: Սարգիս Բժիկյանը մեր հետ զրույցի ժամանակ հայտնեց, որ պատասխանել է, որ չի ստորագրել:
Ոստիկանության կենտրոնականի բաժնում հարուցվել էր քրեական գործ, եւ կեղծ արձանագրություն է դրվել գործի նյութերում. իբր Ս.Բժիկյանին անցյալ տարվա դեկտեմբերի 24-ին հարցաքննել են:
Ս.Բժիկյանը Հատուկ քննչական ծառայությունում էլ ասել էր, որ չէր կարող այդ օրը հարցաքննվել, քանի որ իր կնոջ քառասունքի օրն է եղել:
«Կենտրոնական քննչական բաժինը բացատրություն կամ ցուցմունք տալու համար ինձ չի հրավիրել բաժին, նախաքննությունը կայացել է առանց ինձ, ու որոշում է կայացվել քրեական վարույթը կարճելու , քրեական հետապնդում չիրականացնելու մասին»,-ասում է Ս.Բժիկյանը:
Վերջինն ասում է, որ դիմել է քննիչ Գ.Բեգոյանին, քրեական գործի նյութերին ծանոթանալու համար: Դիմել է բանավոր, ապա գրավոր, սակայն մինչ օրս չի ստացել քրեական գործի նյութերը:
Ավելին, Սարգիս Բժիկյանի անվամբ կադաստրում հայտնվել է մի հայտարարություն, որից նա տեղյակ չէ:
Սարգիս Բժիկյանն ասում է, որ ինքը երկար տարիներ աշխատել է տնօրեն, եւ գիտի, ինչպես կազմել փաստաթղթեր, ում ուղարկել: Սակայն, նա որեւէ փաստաթուղթ անշարժ գույքի պետական կոմիտեին, կադաստրային ստորաբաժանմանը չի ուղարկել:
«Կոմիտեում ոչ բնօրինակը կա, ոչ էլ պատճենը»,-ասում է բողոքաբերը:
Ռուզան ՄԻՆԱՍՅԱՆ
