«Ազատություն» ռադիոկայան. Մեկ տասնամյակի ընթացքում նախկին հարավսլավական երկիրը բարեփոխումներ էր կատարում՝ հասնելու համար իր նպատակին:
Այսօր Խորվաթիան անդամակցում է Եվրամիությանը:
Այսպիսով, հուլիսի 1-ից Եվրամիության ընտանիքը եւս մեկ անդամով ընդլայնվում է՝ հասնելով 28-ի:
Վերջին անգամ Եվրամիությանը 2007 թվականին անդամակցել էին Բուլղարիան եւ Ռումինիան: Վեց տարի անց Եվրոպական միությունը համալրվում է եւս մեկ երկրով:
Եվրամիությանը Խորվաթիայի անդամակցության գործընթացը տեւեց 10 տարի: Մեկ տասնամյակի ընթացքում նախկին հարավսլավական երկիրը բարեփոխումներ էր կատարում՝ հասնելու համար իր նպատակին:
Եվրահանձնաժողովը, որը վերջապես կանաչ լույս վառեց Խորվաթիայի անդամակցության համար, իր մոնիթորինգային զեկույցում նշում է, որ Խորվաթիան ապագայում պետք է լրացուցիչ միջոցներ ձեռնարկի կազմակերպված հանցավորության եւ կոռուպցիայի դեմ պայքարի գործում:
Անցած երեքշաբթի օրը Եվրամիության ընդարձակման հարցերով հանձնակատար Շտեֆան Ֆյուլեն Խորվաթիայի մայրաքաղաք Զագրեբում հայտարարեց․ – «Մենք համոզված ենք, որ Խորվաթիան պատրաստ կլինի 2013 թվականի հուլիսի 1-ին միանալու Եվրամիությանը»:
Միաժամանակ, Ֆյուլեն ասել է, որ Եվրահանձնաժողովի զեկույցը Խորվաթիային նաեւ զգուշացնում է՝ չհանգստանալ ձեռք բերածով:
«Եվրամիությանը անդամակցությունը բարեփոխումների իրականացման լրացուցիչ խթան է: Խորվաթիան պետք է շարունակի հաջողությունները՝ երկրում ապահովելու օրենքի գերակայությունը, եւ հատկապես շարունակի պայքարը կոռուպցիայի դեմ», – ընդգծել է Եվրամիության բարձրաստիճան պաշտոնյան:
Նա գովաբանել է Խորվաթիային Եվրամիության պահանջները իրականացնելու համար՝ ասելով, որ Խորվաթիան Եվրամիությանը մոտենալու լավ օրինակ է տարածաշրջանի երկրների համար:
Առայժմ Խորվաթիան չի ընդգրկվում ազատ ճամփորդության Շենգենի գոտում՝ դա նախատեսված է երկու տարի անց:
Խորվաթիայի սահմանի որոշ հատվածներում վերահսկողությունը արդիականացնելու կարիք կա, մասնավորապես՝ Մոնտենեգրոյի հետ սահմանը, որը անօրինական ներգաղթյալների ուղիներից մեկն է, ինչպես նաեւ սահմանը Բոսնիա եւ Հերցեգովինայի հետ: Օրինակ, Մետկովից քաղաքում փողոցի մի կողմը Խորվաթիան է, մյուս կողմը՝ Բոսնիա եւ Հերցեգովինան․ նախկին հարավսլավական այս երկու պետությունների սահմանը հսկվում է:
Տեղի բնակիչները, ինչպես, օրինակ, բեռնատարի վարորդ Իվո Պրիմորաչը, դժգոհում են՝ այնքան էլ հեշտ չէ այստեղ ապրել, ազատ չեն, չեն կարողանում ցանկացած պահի քաղաք գնալ անցակետերի հսկողության եւ երթեւեկության խցանումների պատճառով:
Հրաչ Մելքումյան
