Այսօր «Նոյյան Տապան» մամուլի ակումբում Համահայկական հիմնախնդիրների «Արեգ» գիտավերլուծական կենտրոնի անդամ Սամվել Նովոյանը խոսեց «Հայ-վրացական ռազմավարական դաշինքից»: Ինչպես նա հայտնեց՝ «ռազմավարական» ասելով նկատի չունի ռազմական եւ քաղաքական իմաստները, այլ արժեհամակարգերի դաշինքը:
«Մենք այսօր ականատես ենք, թե ինչպես է իրականացվում կործանարար մի երեւույթ, որն ուղղված է քրիստոնեական արժեհամակարգի դեմ»,- ասաց Սամվել Նովոյանը: Բանախոսը որպես օրինակ բերեց վերջերս Վրաստանում տեղի ունեցած համասեռամոլների շարժումը:
Ավետարանական ընտանիքի եկեղեցին ներկայացնող բանախոսը համարում է, որ սա արդեն ոչ թե քաղքեդոնական եւ ոչ քաղքեդոնական եկեղեցիների հարցն է, այլ պետք է հստակեցնել՝ ինչ է ընտանիքը:
Այս դաշինքն առաջարկ է եւ դեռեւս չի գործում: Առաջարկված տեքստում ներգրավված են այն խնդիրները, որոնք վերաբերում են ընտանիքին, համասեռամոլությանը, կրթական համակարգին, արվեստին եւ այլն: Ըստ Սամվել Նովոյանի՝ այս ամենն օրեցօր խաթարվում է. «Կործանվում է ընտանիքի ինստիտուտը: Մարդն Աստծո կերպարից վերածվում է «ռեֆլեքսավորված ագրեգատի», օտարվում է գիտությունից, օրենսդրական դաշտից եւ այլն»:
Ինչպես բանախոսը հայտնեց, իրենք հավաքում են ստորագրահավաք համասեռամոլության տարածման արգելման համար: Փորձում են համագործակցել Ազգային ժողովի հետ, որպեսզի այս հարցն ընդգրկվի խորհրդարանում:
Ինչպես Սամվել Նովոյանն ասաց՝ այս հարցով դիմել են եւ հայ, եւ վրաց հոգեւոր գործիչներին: Սպասում են աջակցություն ոչ միայն Վրաստանից, այլեւ Ռուսաստանից:
Ռուբինա ՍԱՖԱՐՅԱՆ
