Այսուհետ ծնողներն իրենց փոքրիկներին պոլիկլինիկա տանելու համար ստիպված չեն լինի մեծ ջանքեր գործադրել, հիվանդանոցային սառը և վախի մթնոլորտ ներշնչող պատերին փոխարինելու են եկել գույնզգույն և դրական էմոցիաներ պարգևող «Շնչող պատեր»-ը: Արդեն հունիսի 2-ից առողջապահական doctors.am կայքը, որը հանդիսանում է ծրագրի հեղինակը՝ մի խումբ կամավորների հետ սկսել է իր գույնզգույն նկարազարդումները տարբեր բուժհաստատություններում: Ծրագրի նախաձեռնողները առաջին նկարազարդումը սկսել են «Նորք» ինֆեկցիոն կլինիկական հանրապետական հիվանդանոցից: Իսկ ահա այս կիրակի՝ հունիսի 30-ին, ծրագրի նախաձեռնողները ուղևորվեցին Շենգավիթ համայնքի №13 պոլիկլինիկա:
«Գաղտնիք չէ, որ այսօր պոլիկլինիկաներից շատերը մեծ մասամաբ ոչ բարվոք վիճակում են,- ասում է նախաձեռնության կազմակերպիչներից Սաթենիկ Գրիգորյանը, -հենց այս ամեն հաշվի առնելով՝ մեզ մոտ միտք հղացավ կազմակերպել նման բարեգործական ակցիա, որի շրջանակներում էլ հնարավոր կլինի նկարազարդել քաղաքի բոլոր մանկական պոլիկլինիկաները և հիվանդանոցների մանկական բաժանմունքները»:
Նրա խոսքով՝ ակցիան անցկացվում է թե՛ պետական, և թե մասնավոր հիվանդանոցների միջև, քանի որ ակցիայի նպատակն է գունեղ նկարազարդումների միջոցով ուրախացնել հիվանդանոցներում բուժվող փոքրիկներին:
«Շնչող պատեր»-ը արդեն նկարազարդել է շուրջ 5 հիվանդանոցներ: Ինչպես նշում է Սաթենիկը՝ բոլոր նրանք, ովքեր ցանկանում են գոնե մի փոքր ուրախացնել հիվանդանոցներում բուժվող փոքրիկներին, կարող են միանալ և իրենց փոքրիկ ներդրումն ունենալ այս ծրագրում:
Կազմակերպիչները որոշել են լինել բոլոր պոլիկլինիկաներում՝ կախված է նրանից, թե ինչ վիճակ է տիրում այնտեղ և դեռ որքան գումար կհավաքվի ակցիայում շրջանակներում:
Պատկերազարդումները կատարվում են հետեւյալ կերպ. նկարիչները ընտրում են տարբեր էսքիզների միջոցով, այնուհետև համաձայնության են գալիս պոլիկլինիկաների տնօրենների հետ և հետո միայն գործի անցնում:
Ուրախ վառ գույնե՜ր, հեքիաթի ամենատարբեր հերոսնե՜ր ահա և պատրաստ է ամեն ինչ բուժհաստատությունը իսկական հեքիաթ-մոլորակ դարձնելու համար:
«Շնչող պատեր»-ը հասցրել է անգամ ավանդույթ ձևավորել ՝ ամեն աշխատանքի վերջում նախագծի հեղինակ Զավեն Քոլոյանը պատկերում է իր հեղինակային կապույտ թռչունը և այդպես ազդարարում նոր հեքիաթ-մոլորակի գունազարդման ավարտը և մեկ այլ նոր աշխատանքի սկիզբը:
Օվսաննա Սիմոնյան
