Ըստ «Դատալեքս» տեղեկատվական կայքի՝ Լոռու մարզի Վանաձոր քաղաքի բնակիչ, 1968 թ. ծնված Գառնիկ Մխիթարյանը, 1990 թվականից լինելով «ՀՀ որսորդների եւ ձկնորսների» հասարակական կազմակերպության անդամ, 2013 թվականի փետրվարի 1-ին Եղեգնուտի մոտակա անտառում իր որսորդական հրացանով կատարել է այծյամի ապօրինի որս՝ պետությանը պատճառելով 250 հազար դրամի վնաս: Գ. Մխիթարյանի նկատմամբ խափանման միջոց է ընտրվել չհեռանալու մասին ստորագրությունը:
Մինչ դատաքննությունը սկսվելը Գ. Մխիթարյանը միջնորդել է դատական քննությունն անցկացնել արագացված կարգով, հայտարարելով, որ առաջադրված մեղադրանքն իրեն պարզ է, համաձայն է մեղադրանքի հետ: Լոռու մարզի առաջին ատյանի դատարանը նրա պատասխանատվությունը մեղմացնող հանգամանք է համարել այն, որ նա կատարվածի համար զղջացել է, տվել է խոստովանական ցուցմունքներ, նախկինում դատված չէ, խնամքին ունի անչափահաս երեխա, ամբաստանյալը նախաքննության ընթացքում հօգուտ պետական բյուջե վճարել է 250 հազար դրամ՝ որպես պետությանը պատճառված վնասի փոխհատուցում:
Հունիսի 18-ին Լոռու մարզի առաջին ատյանի դատարանի դատավոր Նարինե Հովակիմյանը վճռել է Գառնիկ Մխիթարյանին մեղավոր ճանաչել ՀՀ քրեական օրենսգրքի 294 հոդվածի 1-ին մասի 1-ին կետով («Ապօրինի որս, որ պատճառել է խոշոր վնաս»)եւ նրան դատապարտել 400 հազար դրամի չափով տուգանքի: Դատարանը վճռել է տուգանքի վճարումը տարաժամկետել 10 ամսով՝ Գ. Մխիթարյանին պարտավորեցնելով ամեն ամիս վճարել 40 հազար դրամ տուգանք:
Ոսկան ՍԱՐԳՍՅԱՆ
