Այսօր «Խոշտանգումներից զերծ մնալու եւ վերականգնման իրավունք» համաժողովի ժամանակ «Զինվորի մայր» ՀԿ նախագահ Մարգարիտա Խաչատրյանը համաժողովին ներկա արդարադատության փոխնախարար Ռուբեն Մելիքյանից հետաքրքրվեց՝ եթե զինվորը երկու տարի շարունակ անազատության մեջ է եղել՝ պարբերաբար ենթարկվելով խոշտանգումների, եւ երկու տարի անց դատարանը արդարացման վճիռ է կայացրել, մի՞թե նա չպետք է փոխհատուցում ստանա՝ անազատության մեջ անցկացրած տարիների եւ խոշտանգումների համար:
Արդարադատության նախարարն, ընդունելով, որ փոխհատուցման խնդիրը լուրջ է, եւ այն հարցն է, որ անպայման լուծում է պահանջում, ասաց, որ կառավարությունը ծրագիր ունի՝ ներդնել փոխհատուցումների համակարգ. «Մենք աշխատում ենք դրա վրա՝ ոչ նյութական վնասների համար դրամական փոխհատուցում ներդնելու նուրբ, բազմապրոֆիլային եւ գրագետ կազմված համակարգ է պետք: Մեխանիզմներ են պետք մշակել, շատ համապարփակ հարց է, եւ խնդիրները բազմաթիվ են՝ ֆինանսականից սկսած մինչեւ կազմակերպչական, քանի որ դա ստրատեգիական խնդիր է մեզ համար»:
Նա տեղեկացրեց նաեւ, որ պիտի աշխատեն նաեւ այնպես անել, որ մեր գործերը լսվեն եւ լուծվեն տեղում՝ առանց Մարդու իրավունքների եվրոպական դատարան հասնելու, քանի որ ՄԻԵԴ-ում հիմա հարյուր հազարից ավելի գործեր կան կուտակված. «Դա ձեռնտու կլինի նաեւ դիմողներին, քանի որ մի քանի տարի սպասում են, մինչեւ ՄԻԵԴ-ը վճիռ կայացնի: Ճիշտ է, մեր պարագայում փոխհատուցումը էականորեն փոքր կլինի, քան ՄԻԵԴ-ի վճռի դեպքում, սակայն այդքան երկար չի սպասի»:
Կարդացեք նաև
Մելանյա ԲԱՐՍԵՂՅԱՆ
