Անցնող շաբաթը աչքի ընկավ ռազմաքաղաքական մի շարք կարեւոր իրադարձություններով: Նախ հայտնի դարձավ, որ Ռուսաստանը Ադրբեջանին վաճառել է 1 մլրդ դոլարի զենք: Այնուհետեւ Արթուր Բաղդասարյանի հրավերով Հայաստան ժամանեց Նիկոլայ Պատրուշեւը` 25 հոգանոց պատվիրակությամբ եւ հագեցած աշխատանքային օրակարգով: Հայաստանում Պատրուշեւը շտապեց հայտարարել` Հայաստանը եւ Ռուսաստանը «սոյուզնիկներ» են, եւ որ ռուսական 102-րդ բազան ու ռուս սահմանապահները մերոնց հետ հուսալիորեն ապահովում են Հայաստանի անվտանգությունը, եւ այդ առումով Հայաստանը որեւէ անհանգստություն չպետք է ունենա, եւ որ Հայաստանի անվտանգության ապահովման առումով կան բավարար միջոցներ եւ ուժ: Բացի այդ՝ Նիկոլայ Պատրուշեւն ու Արթուր Բաղդասարյանը ստորագրեցին 5 կարեւոր փաստաթուղթ, որոնք նպաստելու են անվտանգության եւ ռազմական ենթակառուցվածքների վերազինմանն ու արդիականացմանը` սկսած բազաներից մինչեւ սահմաններ եւ պետական ռեզերվներ: Նախօրեին Արթուր Բաղդասարյանը լրագրողների հետ ճեպազրույցում հստակ ակնարկեց, որ բացի զենք-զինամթերք ունենալուց՝ շատ կարեւոր է նաեւ ժամանակակից եւ վերազինված ենթակառուցվածքներ ունենալը, ինչն էլ րոպեներ անց հաստատեց Պատրուշեւը: Հետաքրքիր զուգադիպությամբ Պատրուշեւի այցին անմիջապես հաջորդեց ՀԱՊԿ գլխավոր քարտուղար Նիկոլայ Բորդյուժայի այցը, որն այսօր նույնպես վերահաստատեց Բաղդասարյանի ասածները` հավելելով նաեւ, որ Հայաստանը ՀԱՊԿ առանցքային անդամներից է, եւ ՀԱՊԿ-ը Հայաստանի կողքին է: Ակնհայտ է, որ Ռուսաստանի եւ ՀԱՊԿ-ի հետ Հայաստանի ռազմավարական գործակցությունը հետաքրքիր դրսեւորումներ է ստանում, եւ դա կատարվում է Պատրուշեւ-Բորդյուժա-Բաղդասարյան եռյակի ձեռամբ, որոնց հարաբերություններն, ինչպես երեւում է, առանձնանում են իրենց ջերմությամբ եւ գործնականությամբ: Թե ինչ կտա մեզ այս ամենը՝ կերեւա առաջիկայում:
«Առավոտ» օրաթերթ
Կարդացեք նաև
Որ մեզ հիմարի տեղ են դնում Պատրուշեւներն ու Բորդյուժաները դա ինչ ու տեղ հասկանալի է, բայց վատը նա է որ դա փորձում է անել նաև Արթուր Բաղդասարյանի միջոցով մեր իշխանությունները: