Սողունագետ Արամ Աղասյանը վստահեցնում է, օձերի թվի աճ վերջին երեք տարիներին Հայաստանում չի գրանցվել:
«Երեւանում տեղի ունեցող քաղաքաշինությունը վերափոխում է էկոհամակարգը… օձերի թվաքանակը նույնիսկ պակասում է, բայց մեծացել է մարդկանց հետ հանդիպման հավանականությունը: Եթե օձերի բնակավայրերում շինարարություն է կատարվում նրանք փոխում են իրենց բնակավայրերը»,- այսօր «Էկոլուր» ակումբում ասաց սողունագետը:
Նրա խոսքերով, Երեւանում ու Երեւանի շրջակայքում միակ թունավոր օձը գյուրզան է: Այս տեսակին կարելի է հանդիպել Հրազդանի կիրճում, հեռուստաաշտարակի մոտ, Հաղթանակի զբոսայգում եւ Էրեբունու տարածքում: Սողունագետն ասաց՝ քիչ հավանական է, որ հենց այդ տեսակին կարող է մարդը հանդիպել:
Նա նաեւ խորհուրդ տվեց՝ ինչ անել օձին հանդիպելիս:
Կարդացեք նաև
Եթե պատահական հանդիպել եք շատ մոտ տարածության վրա, պետք է անշարժ կանգնել, մինչեւ օձը հեռանա, որովհետեւ ըստ նրա, օձը երբեք նախահարձակ չի լինում: Իսկ եթե շատ հեռու տարածության վրա եք հանդիպել, ապա պետք է արագ հեռանաք:
Բնապահպան Սիլվա Ադամյանն էլ շարունակեց՝ «Ինչու ենք այսքան օձերի հանդիպում, որովհետեւ մեր քաղաքը վերադառնում է դեպի կիսաանապատային գոտի»: Տիկին Ադամյանի հետ չհամաձայնեց սողունագետը, ու սկսվեց վիճաբանություն:
«Ծիծաղելի ենթադրություններ են, թողեք մասնագետները խոսեն մի բան մասին, որովհետեւ ոչ մասնագիտական բաներ եք ասում ու շատ սխալ է»,- ասաց սողունագետը:
«Ես ձեզ ուզում եմ ասել, որ մեր քաղաքը վերադառնում է իր հին վիճակին, համաձայն չե՞ք»,- հարցրեց Սիլվա Ադամյանը:
Սողունագետն էլ նրան հորդորեց խոսել մոծակների մասին: Երկու մասնագետները սկսեցին վիճել, երբ տիկին Ադամյանը խոսեց մոծակների ակտիվության մասին:
«Դուք ասում եք միջատների թվաքանակն ավելացել է, ի՞նչ հակասություն է ստացվում, եթե միջատների թվաքանակը շատացել է, ինչու է պակասել միջատակերների թվաքանակը… տենց մի հեքիաթներ պատմեք»,- ասաց սողունագետը:
«Դրանի՞ց էլ տեղյակ չեք պարոն Աղասյան….»,- պատասխանեց Սիլվա Ադամյանը,- «Պետք չէ տպավորություն ստեղծել, որ դուք մասնագետ եք, իսկ ձեր կողքինը՝ոչ»:
Արփինե ՍԻՄՈՆՅԱՆ
