Նյարդայնանալու պատճառները բազմաթիվ են՝ սկսած բուռն օրվա անհաջողություններից մինչև անգամ անգործություն ու ձանձրույթ: Ի՞նչն է ավելի շատ նյարդայնացնում երիտասարդներին, պարզել է «Առավոտ երիտասարդականը»: Սկսում ենք մենք, շարունակում եք դուք.
«Ես նյարդայնանում եմ, երբ մութն ընկնում է, և հասկանում եմ, թե որքան քիչ բան եմ հասցրել անել այսօր», – ասում է 17-ամյա Մարիան:
«Ես նյարդայնանում եմ, երբ գիրք կարդալիս հեռախոսս զանգում է, – ասում է 18-ամյա Յանան ու հավելում, – դրա համար սովորաբար անջատում եմ»:
«Ես նյարդայնանում եմ, երբ անմակարդակ բորենիները իրենց մարդ են կարգում», – ասում է 21-ամյա Արթուրը:
«Ես նյարդայնանում եմ, երբ երթուղային եմ նստում, – ասում է 20-ամյա Վարդուհին, – և դա լինում է ամեն օր»:
25-ամյա Գևորգը երկար չմտածեց նախքան պատասխանելը. «Ես նյարդայնանում եմ, երբ ստում են աչքերիս նայելով ու հատկապես այն դեպքում, երբ ճշմարտությունը գիտեմ», – ասաց նա:
18-ամյա Լանան վստահեցնում է, կարիք չկա իրեն կոնկրետ նյարդայնացնելու. «Ես միշտ նյարդային եմ», – ժպտում է նա:
«Ես նյարդայնանում եմ, երբ որոշ մարդիկ սկսում են մի բան պնդել՝ այն դեպքում երբ ակնհայտ սխալ են», – ասում է 23-ամյա Անահիտը:
Խնայեք ձեր նյարդերը. Տիգրանուհի Թասլակյան
