Շուրջ յոթ օրվա ընթացքում, 3-4 օր ընդմիջումներով, անցկացվել են 15 ուսումնական առարկաների պետական ավարտական և միասնական քննություններ, որոնք իրականացվել են 36 քննակենտրոններում, որոնցից 11-ը Երևանում, մնացածը` մարզերում: «Ամենաշատ դիմորդները գրանցվեցին հայոց լեզու և հայ գրականություն առարկայից` 8648 դիմորդ, այնուհետև մաթեմատիկա և անգլերեն առարկաներից: Այս առարկաներից քննությանը չեն ներկայացել 300 դիմորդ»,-այս մասին այսօր լրագրողների հետ հանդիպման ընթացքում ասաց գնահատման եւ թեստավորման կենտրոնի տնօրեն Գագիկ Մելիքյանը:
Ըստ բանախոսի` հիվանդության և այլ պատճառներով ընդհատվել է 22 դիմորդի աշխատանք` ամբողջ հանրապետությունում, որից հինգ դիմորդ հեռացվել են քննասենյակից: «Այս պահին ընթանում է բողոքարկման փուլը: Եվ մի քանի օրից վերջնական տվյալները կհրապարակվեն»:
Մելիքյանը նշեց, որ այս տարվա նորությունը պայմանավորված էր շտեմարանների մուտքով: Եթե անցյալ տարի շտեմարաններ ներդրվեցին միայն հայոց լեզու և մաթեմատիկա առարկաներից, ապա այս տարի բացի հայոց պատմությունից և լեզուներից (պարսկերեն, իսպաներեն, իտալերեն), մնացյալ բոլոր առարկաների գծով ներդրվել են շտեմարաններ: «Քննական տեքստերում կային նաև կառուցվածքային փոքրիկ փոփոխություններ: Շտեմարանները, անշուշտ, օգտակար էին: Շտեմարաններն էին, որ մեզ հնարավորություն տվեցին հնարավորինս նորմալ թեստեր կազմել, սակայն ինչպես յուրաքանչյուր գործընթաց` շտեմարանների մուտքը բերում է որոշակի ռիսկեր: Շտեմարանի առկայության դեպքում մենք շատ ունեցանք ծածկագրերից օգտվելու, բջջային հեռախոսներում հավաքելու և կիրառելու փորձեր: Այսինքն շտեմարանի առկայությունը դիմորդին մղում է, այլ ճանապարհներով ստանալ իր միավորները»,-ասաց Մելիքյանը:
Վերջինս ընդգծեց, որ ԿԳ նախարարության հետ կքննարկեն շտեմարանների հարցը, քանի որ շտեմարանները վերջնական դեռ մաքրված չեն և հույս հայտնեց, որ հաջորդ տարի կունենանք անթերի շտեմարաններ, որոնցում որևէ խնդիր չի լինի:
Կարդացեք նաև
Ըստ Մելիքյանի` այս տարի քննությունները շատ հանգիստ են անցել, որի մասին վկայում է հենց բողոքարկումների քանակը: «Կա մոտ չորս հարյուր բողոքարկում, որը նախորդ տարիներից երեք անգամ քիչ է: Բողոքարկումները հիմնականում եղել են կտրվողների կամ մեկ միավոր պակաս հավաքած դիմորդների կողմից»,-ասաց նա:
Գնահատման եւ թեստավորման կենտրոնի (ԳԹԿ) արտաքին համագործակցության բաժնի պետ Արա Իսպիրյանն էլ հավելեց, որ ընդհանուր հանրագումարով բոլոր առարկաների միջինը կազմել է տասից մինչև տասնհինգ միավոր, իսկ շեմը չհաղթահարողները կազմել են ընդհանուր դիմորդների 19%-ը:
Քրիստինա ՄԻՐԶՈՅԱՆ
