Ավան եւ Նոր Նորք վարչական շրջանների ընդհանուր իրավասության դատարանի դատավոր Դավիթ Հարությունյանը «Հարսնաքար» ռեստորանային համալիրի աշխատակիցների կողմից բռնարարքների ենթարկված Վահե Ավետյանի եւ նրա ընկերների գործով այսօր հրապարակեց տուժողների ներկայացուցիչներ Տիգրան Եգորյանի եւ Լուսինե Հակոբյանի կողմից դատարան ներկայացված փաստաթղթերն ու միջնորդությունները:
Տուժողների ներկայացուցիչները միջնորդել էին, որպեսզի քրեական գործի նյութերին կցվի Ռուբեն Հայրապետյանի հարցազրույցը, որը տպագրվել էր «Նուվել դ՚ Արմենիի» ամսագրում:
Ամբաստանյալների պաշտպաններ Միհրան Պողոսյանը, Մարինե Թովմասյանը, Ավագ Լալայանը հարցնում էին, որպես ինչ պիտի կցվի, ի՞նչ հիմքով, որպես նո՞ր ապացույց, այդ դեպքում, ապացույցների ճանաչման կարգ գոյություն ունի:Ամբաստանյալ Գարիկ Մարգարյանի պաշտպան Մարինե Թովմասյանը հիշեցրեց, որ Ռուբեն Հայրապետյանը որպես վկա դատարանում ստորագրել է սուտ ցուցմունք չտալու համար, մինչդեռ նա ազատ է եղել իր զրույցի ժամանակ:
Պաշտպանական կողմի մեկ այլ դիտարկմամբ էլ, նույն տրամաբանությամբ կարելի է այս գործին առնչվող բոլոր հրապարակումները կցել քրեական գործին:
Դատարանը մերժեց այս միջնորդությունը, ակնհայտ անհիմն լինելու պատճառաբանությամբ, նաեւ հայտնեց, որ մեղադրանքի կողմը որեւէ հիմնավորում չի բերել, թե որտեղից է արտատպել, եւ արտատպությունը արդյոք համապատասխանում է բնօրինակին:
Մեկ այլ միջնորդությամբ կողմը պահանջել էր կալանք դնել ամբաստանյալների գույքի վրա:
Դատարանում երկրորդ անգամ տարբեր թարգմանական տեքստեր են ներկայացվում: Ամբաստանյալ Նորայր Հայրապետյանի պաշտպան Երեմ Սարգսյանը չբացառեց, որ կլինի նաեւ երրորդը…
Այդ տեքստը ուղարկվել է Վիեննայի մասնավոր կլինիկայից, համալսարանի պրոֆեսոր Ռուդոլֆ Շաբուսի եզրակացությունն է:
Պաշտպանական կողմը ուզում էր հասկանալ, թե արտերկրի մասնավոր կլինիկայի բժիշկը մասնագե՞տ է, ինչպիսի՞, որքանո՞վ է այն տարբերվում Հայաստանի փորձագիտական եզրակացությունից:
Պաշտպան Միհրան Պողոսյանը նկատեց, որ գերմաներենից թարգմանված տեքստի մեջ նշվել է.«Սպորտային վնասվածքաբանության եւ դժբախտ պատահարի վիրաբուժության գծով մասնագիտացված բժիշկ» ստորագրած, սպորտային վնասվածքաբանի տված եզրակացությունը ի՞նչ կապ ունի այս գործի հետ: Իսկ պաշտպան Արման Խաչատրյանն էլ մեջ բերելով հետեւյալը՝ «Հիվանդների վնասվածքի հետեւանքի վրա ազդող այլ թերապիա չի անցկացվել», հարցրեց. «Ինչ հիվանդների մասին է խոսքը, արդյոք թարգմանությունը ճիշտ է արված»:
Անհարթ էր նաեւ հետեւյալ ձեւակերպումը. «Վահե Ավետյանի ուղեղի խիստ վնասվածքը տրավմայի պատճառ է հանդիսանում»:
Տուժողների ներկայացուցիչները պնդեցին իրենց միջնորդությունը դատակոչի վերաբերյալ: Չնայած նախորդ վկաները էական որեւէ հանգամանք չեն ավելացրել գործին, սակայն, երկու վկա նորից կկանչվեն հաջորդ նիստին, ու դրանից հետո կորոշվի վկաների դատակոչը սահմանափակելու մասին:
Դատական հաջորդ նիստը նշանակվեց հունիսի 28-ին:
Ռուզան ՄԻՆԱՍՅԱՆ
