«Ազատություն» ռադիոկայան. Եվրամիությունը համաձայնել է Թուրքիայի հետ բանակցությունների նոր փուլ սկսել, սակայն հետաձգել է այն մինչեւ հոկտեմբերին Եվրահանձնաժողովի կողմից երկրի առաջընթացի վերաբերյալ տարեկան զեկույցի ներկայացումը եւ քննարկումը:
Hurriyet Daily News-ի փոխանցմամբ, առաջարկը ներկայացրել է Գերմանիան, որը համարում է, որ Եվրամիությանը Թուրքիայի անդամակցության հարցով բանակցությունների նոր փուլը պետք է հետաձգել շուրջ չորս ամսով` արտահայտելով դաշինքի դժգոհությունը պաշտոնական Անկարայի կողմից հակակառավարական ցույցերի ճնշման կապակցությամբ:
Եվրահանձնաժողովի զեկույցի քննարկումից հետո Եվրամիությունը միասնական դիրքորոշում կարտահայտի բանակցությունների փաստաթղթի 22-րդ գլխին անցնելու հարցով եւ կսահմանի Ընդունելության կոնֆերանսի ժամկետները, փոխանցում է թուրքական պարբերականը:
Թուրքիայի արտգործնախարար Ահմեթ Դավութօղլուն ողջունել է բանակցությունների նոր փուլ սկսելու Եվրամիության որոշումը, որը հարցականի տակ էր առաջին հերթին Գերմանիայի վերապահումների պատճառով:
