2013-ի մայիսի 31-ի դրությամբ Երեւան քաղաքում գրանցվել է 396 ճանապարհատրանսպորտային դեպք, որը 54-ով ավելի է նախորդ տարվա նույն ժամանակահատվածի համեմատ: Փոխարենը զոհերի քանակն է երեքով պակասել՝ այս տարի զոհվել է 21 մարդ՝ նախորդ տարվա 24-ի փոխարեն: Վիրավորների քանակը 56-ով ավելացել է՝ դառնալով 511:
Այս տվյալները ներկայացնելով՝ ՃՈ պլանավորման, հաշվառման եւ վերլուծության բաժնի պետ Արմեն Խաչատրյանը եւ ՃՈ իրավաբանական վարչության պետ Արմեն Չիլինգարյանը այսօր «Ֆորում» ակումբում համոզմունք հայտնեցին, որ թեեւ ՃՏՊ-ների քանակն ավելացել է, սակայն նվազել է դրանց ծանրության աստիճանը, եւ դա՝ արագաչափ սարքերի եւ խաչմերուկներում տեսախցիկների առկայության շնորհիվ: Քանի որ ծանր հետեւանքներով, մասնավորապես՝ զոհերով, ճանապարհատրանսպորտային պատահարները հիմնականում արագության գերազանցման, ինչպես նաեւ՝ խաչմերուկներում լուսացույցների հրահանգներին չենթարկվելու արդյունքում են գրանցվում, իսկ այդ սարքավորումների առկայությունը վարորդներին ստիպում է զսպել արագությունը եւ ավելի ուշադիր լինել լուսացույցների հրահանգների հանդեպ:
Ի դեպ, թեեւ ոստիկանությունում չեն կազմում՝ արագության գերազանցման թոփ-տասնյակ, սակայն բարձրաստիճան ոստիկանները լրագրողների խնդրանքին ի պատասխան հիշեցին, որ Երեւանում գրանցված ամենամեծ արագություններից մեկը եղել է Արշակունյաց պողոտայում՝ 175 կմ/ժ՝ մինչեւ արագաչափերի տեղադրումը:
Մելանյա ԲԱՐՍԵՂՅԱՆ
