Այսօր պաշտոնական այցով Հայաստանի ազգային անվտանգության խորհրդի քարտուղար Արթուր Բաղդասարյանի ուղեկցությամբ Գյումրի էր ժամանել նրա ռուս կոլեգան` ՌԴ անվտանգության խորհրդի քարտուղար Նիկոլայ Պատրուշևը: Նրանք հյուրընկալվեցին հայ-ռուսական հարաբերությունները խորհրդանշող Պատվո բլուրում, որտեղ ծաղկեպսակներ դրեցին ռուս զինվորների գերեզմաններին, մտան ռուսական Պլպլան ժամ` աղոթեցին:
Լրագրողները ռուս պաշտոնյայից հետաքրքրվեցին, թե ինչո՞ւ է Գյումրիում 102-րդ ռազմաբազա տեղադրած, Հայաստանի ռազմավարական գործընկեր համարվող Ռուսաստանը միաժամանակ զենք վաճառում Ադրբեջանին: «Դուք գիտեք, Ռուսաստանը առևտրային հարաբերությունների մեջ է բոլոր երկրների հետ, և յուրաքանչյուր երկիրը, որը ուզում է գնել, հնարավորություն ունի ըստ օրենքի ձեռք բերել զենք Ռուսաստանից»,- այսպիսի պատասխան տվեց ռուս պաշտոնյան:
Նա, ժամանակակից համարելով ռուսական ռազմաբազան Գյումրիում և շեշտելով, որ ռուս զինծառայողները հրաշալի են իրենց զգում Հայաստանում, միաժամանակ ասաց, որ քանի դեռ ռուսները զինծառայության մեջ են Հայաստանում, նրանք երաշխիքն են , որպեսզի բացասական երևույթներ տեղի չունենան Հայաստանի տարածքում:
Նունե ԱՐԵՎՇԱՏՅԱՆ
