«Եկել եմ Հայաստան՝ մասնակցելու կլոր սեղանի քննարկմանը: Համագործակցելու միտումներ կան, հուսանք , որ կզարգանա կապը տեղի ուսանողների հետ: Փորձն արդեն ցույց է տվել, որ կան խելացի անձինք, ովքեր կարող են իրենց ներդրումն ունենալ»,- Գիտությունների ազգային ակադեմիայի և Մոսկվայում Մեծ Բրիտանիայի դեսպանատան Գիտության և ինովացիոն կենտրոնի՝ գիտության ոլորտում համագործակցության վերաբերյալ համատեղ քննարկման ընթացքում ասաց Լոնդոնի Կայսերական քոլեջի քիմիական ճարտարագիտության բաժնի պրոֆեսոր, Քիմիայի թագավորական միության անդամ Սերգեյ Ղազարյանը:
Նա որպես Հայաստանից Մոսկվա մեկնած լավագույն ուսանողներից, այժմ նաեւ մասնագետ, նշեց Գարիկ Մարտիրոսյանին:
Պրոֆեսորն ուսումնասիրում է դեղագործություն եւ այժմ ունի առաջարկ՝ նորամուծություններ, որոշ դեղերի համար: Ուրախ է, որ աշխատանքներն իրականացնելու է Տիգրան Կուրտիկյանի հետ:
ՀՀ ԳԱԱ Օրգանական եւ դեղագործական քիմիայի գիտատեխնոլոգիական կենտրոնի Մոլեկուլի կառույցի ուսումնասիրությունների կենտրոնի Օպտիկական սպեկտրոսկոպիայի բաժնի վարիչ, պրոֆեսոր Տիգրան Կուրտիկյանն էլ հայտնեց, որ համագործակցությունն իրատեսական է: «Մենք այսօր էլ ունենալով շատ լավ սարքավորումներ՝ դեղերի անալիզները կատարում ենք շատ բարձր մակարդակով: Շատ կազմակերպություններ մեզ դիմում են, եւ մենք սպասարկում ենք: Սերգեյն ավելի շատ զարգացրել է տեսական ուղղությունը, եւ դա էլ մենք երեւի կարող ենք հետագայում օգտագործել»,- նշեց նա:
Ինչպես ասաց՝ գիտական առումով իրենց գործարանը վերջին տասնամյակում արժեքավոր արդյունքներ է տվել, իրենք էլ իրենց լուման են ներդնում, որը մասնակիորեն կապված է նաեւ դեղագործության հետ: «Մեր հետազոտությունները ցույց են տվել, որ ազոտի օքսիդի գեներացվող աղբյուրները կարող են օգտագործվել բժշկության մեջ», -հայտնեց Տիգրան Կուրտիկյանը:
ՀՀ ԳԱԱ-ում քննարկվեցին հարցեր նաեւ տիեզերքի, ջրային ռեսուրսների, սննդի եւ կլիմայի փոփոխության ոլորտներից:
Ռուբինա ՍԱՖԱՐՅԱՆ
