Սոցիոլոգ Ահարոն Ադիբեկյանը այսօր «Ֆորում» ակումբում կայացած ասուլիսի ժամանակ ասաց, որ «ցանկացած հարգված քաղաքական գործիչ օֆշորում ունի հաշվեհամար»: Այդ կապակցությամբ «Առավոտը» նրանից հետաքրքրվեց՝ «դա փաստերի՞ հիման վրա եք ասում, թե ենթադրում եք»: «Չէ, երբ վերցնում եք ռուսական մամուլը, տեսնում եք, որ բավականին լուրջ թվեր կան. տարեկան 30-60 մլրդ դոլարի արտահոսք է լինում այդ երկրից: Դա միայն բիզնես դասը չի: Խուսափելու համար ուղիղ ձեւով կաշառք վերցնելուց, կաշառքը փոխանցվում է օֆշոր զոնա, հետո օգտագործվում»,-ասաց նա:
Այսինքն, նաեւ Հայաստանի դեպքում է դա ընդունելի՞՝ մեր այս հարցին պարոն Ադիբեկյանը շատ անկեղծ պատասխան տվեց. «Հա, մեր դեպքում էլ շատ հնարավոր է: Օրինակ, մենք գործարք էինք անում, փոխանցումը պետք է գար՝ եթե հարկերը մուծեինք, տակից դուրս չէինք գա, մեզ առաջարկեցին օֆշորում հաշիվ բաց անել, փողը փոխանցեն այնտեղ, որ ատկատը այդտեղից վերցնեն, ով որ մեզ էդ ծրագիրը բերել էր, բնականաբար, ակնկալիքներ ուներ: Դա շատ ընդունված բան է, եւ պետությունը դեմ չի, որովհետեւ վերջին հաշվով, եթե երկիր ինչ-որ մի հատ գումար է մտնում, աշխատատեղ է ստեղծվում, արդեն լավ է: Ամբողջ աշխարհում էդպես է: Միայն ԱՄՆ-ում է բավականին խիստ, որովհետեւ ամենամեծ պատիժը հարկային խախտումների համար է: Կարող ես բռնաբարել, սպանել, դա բավականին թեթեւ հանցագործություն է, քան հարկային օրենսդրությունը խախտելը: Մնացածները թույլ են տալիս, որովհետեւ օֆշորային գոտին գորշ գոտի է համարվում, կան նաեւ սպիտակ եւ սեւ գոտիներ: Սեւը ամենավատն է՝ զենքերի եւ նարկոբիզնեսի, թրաֆիկինգի գումարներ են ֆռֆռում, էմբարգո խախտման գումարներն են այդտեղ, իսկ օֆշորը գոնե վերահսկելի է դառնում, եւ հիմա ամբողջ աշխարհում ուզում են գոնե սեւը լրիվ վերացնել, գորշը մնա»:
Ձեր ասածներից ստացվում է, որ ամեն ինչ նորմալ է, օֆշորային գոտում հաշվեհամար ունենալը ընդունելի է եւ այլն, այդ դեպքում ինչո՞ւ եք դա բացառում կոնկրետ Տիգրան Սարգսյանի հետ կապված: «Առավոտի» այս հարցին պարոն Ադիբեկյանը պատասխանեց.«Որովհետեւ հարցեր կան: Եթե նա է բացել՝ նա պիտի գնար այնտեղ, եթե ինչ-որ մեկին տվել է վկայագիր կամ հավաստագիր, դա ինչ-որ նոտարում պիտի գրանցված լինի… »: «Այո, բայց «Հետքի» խմբագիրը երկու օր առաջ «Սիվիլնեթին» տված հարցազրույցում ասել էր, որ իրենք փաստեր ունեն, որ նույն Կճոյանը երկու անգամ եղել է Կիպրոսում» ՝ մեր այս դիտարկմանը պարոն Ադիբեկյանը պատասխանեց.«Հա, բայց դա չի նշանակում, որ գնացել է նաեւ Տիգրան Սարգսյանը: Հետո՝ Կիպրոսում կա հայկական համայնք, հայկական ճեմարան, կարող է գնացել է այնտեղ… Մի խոսքով, դա բավականին բարդ հարց է: Ես հույս ունեմ, որ վերահսկող գերատեսչությունները՝ դատախազությունը, քննչական մարմինները, կզբաղվեն եւ կասեն ճշմարտությունը»:
Այսօրվա ասուլիսի ընթացքում Ահարոն Ադիբեկյանի խոսքերից տպավորություն ստեղծվեց, որ Սերժ Սարգսյանի համար վարչապետի ամենաընդունելի տարբերակը Տիգրան Սարգսյանն է այս պահին: Արդյո՞ք դա այդպես է՝ «Առավոտի» այս հարցին ի պատասխան սոցիոլոգը պատասխանեց.«Քանի մենք միջազգային կառույցներին պարտքեր ունենք՝ 5 մլրդի հասնող, Տիգրան Սարգսյանը անփոխարինելի է, որովհետեւ նա է այդ կառույցների հետ տասնհինգ-տասնյոթ տարի շարունակ աշխատում, եւ նա այսօր ամենաընդունված եւ ճանաչված գործիչն է միջազգային կազմակերպություններում»:
Չե՞ք կարծում, որ օֆշորի հետ կապված այս սկանդալը նրա վարկը կգցի նաեւ այդ կազմակերպությունների աչքում՝ մեր այս հարցին պարոն Ադիբեկյանը պատասխանեց այսպես. «Չէ’: Էդ սկանդալները ապրում են ինչքա՞ն՝ մի շաբաթից երկու ամիս ու մոռացվում են»: Եվ հետո հիտլերյան ոգով ավելացրեց. «Հիմա ո՞վ է հիշում Կարապետիչին: Ի~նչ աղմուկ էր, որ ԱԼՄ-ն փակեցին, հիմա ո՞վ է հիշում նրան: Հանրային կարծիքը բավականին թույլ հիշողություն ունի…»
Կարդացեք նաև
Մելանյա ԲԱՐՍԵՂՅԱՆ
Լուսանկարը` PanArmenian Photo-ի
