Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանը մերժեց տուժող ԱԻՄ առաջնորդ Պարույր Հայրիկյանի միջնորդությունը, որով խնդրում էր հրավիրել դատարան Ռուսաստանի քաղաքացիներ Էդուարդ եւ Ալեքսանդր Աբրահամյաններին, որոնք նաեւ կհայտնեն, թե մինչ իր նկատմամբ մահափորձը Ռուսաստանից ինչու են 100 հազար դոլար փոխանցել Վարդան Սեդրակյանին:
Վարդան Սեդրակյանի պաշտպան Ալեքսանդր Սիրունյանը հանդես եկավ միջնորդությամբ, այն է՝ իր պաշտպանյալի խափանման միջոցը փոխելու համար: Նա ասաց, որ որեւէ ապացույցով չի հիմնավորվում Սեդրակյանի մասնակցությունը մահափորձին եւ անհրաժեշտություն չկա Սեդրակյանին կալանքի տակ պահելու համար: Նա ասաց, որ Սեդրակյանն ունի զգալի անշարժ եւ շարժական գույք, չի փախչի, քանի որ վախենալու բան չունի եւ դատարանին տրամադրեց քրեակատարողական հիմնարկների բուժվարչության պատասխանատու Ալեքսանդր Սարկիսովի գրությունը, համաձայն որի՝ Վարդան Սեդրակյանը տառապում է խրոնիկական հեպատիտ հիվանդությամբ:
Ի դեպ, Պարույր Հայրիկյանն ասաց, որ մշտապես դեմ է եղել առհասարակ նախնական կալանքին եւ ասաց, որ չի առարկի, եթե ամբաստանյալների՝ «էն երկուսի» (նկատի ուներ Խաչիկ Պողոսյանին եւ Սամվել Հարությունյանին) կալանքը փոխվի:
Ռուզան ՄԻՆԱՍՅԱՆ
